Arsenal ​បន្ដ​កំណត់ត្រា​ឈ្នះ​១០០​% ​នៅ​ដើម​រដូវ​កាល​៥​ប្រកួត​មក​នេះ​

​ក្រុម​កាំភ្លើង​ធំ​កំពុង​ធ្វើ​បាន​ល្អ​មែនទែន ​ដោយ​បន្ដ​កំណត់ត្រា​ឈ្នះ​១០០%​តែ​ម្ដង​នៅ​៥​ប្រកួត​ដើម​រដូវ​កាល​មក​នេះ ​ក្រោយ​ពី​យក​ឈ្នះ​លើ​ក្រុម Aston Villa ​បាន ​២-១។

​បន្ទាប់​ពី​នាំ​ចូល​កីឡាករ​ច្រើន​នាក់​មក​នេះ ​ក្រុម​របស់​លោក Mikel Arteta ​ចាប់​ផ្ដើម​លេង​សហការ​គ្នា​បាន​ល្អ​ហើយ។ ជាក់​ស្ដែង​នៅ​យប់មិញ ពួកគេ​បន្ដ​យក​ឈ្នះ​លើ​ក្រុម Aston Villa ​បាន​ក្នុង​លទ្ធផល ២-១ ​ទៀត​។ ដោយ​២​គ្រាប់​សម្រេច​បាន​នោះ​ចេញ​ពី Gabriel Jesus ​១​គ្រាប់ នៅ​នាទី​៣០ ​និង Gabriel Martinelli ​១​គ្រាប់​នៅ​នាទី​៧៧។ ​២​គ្រាប់​នេះ​ល្មម​សម្រាប់​ក្រុម Arsenal ​យក​៣​ពិន្ទុ​បន្ថែម​ទៀត​នៅ​សប្ដាហ៍​ទី​៥​នៃ​លីគ​កំពូល​អង់គ្លេស​នេះ​។

​បើ​គិត​ត្រឹម​ពេល​នេះ Arsenal ​មាន​កំណត់ត្រា​ឈ្នះ​១០០​%​តែ​ម្ដង ​ហើយ​កំពុង​ឈរ​នៅ​កំពូល​តារាង Premier League ​មាន​១៥​ពិន្ទុ​ពេញ។ ​ក្រុម​លេខ​២ Manchester City ​មាន​១៣​ពិន្ទុ ​ឆ្លង​កាត់​៥​ប្រកួត​ដូច​គ្នា៕

ភ្ជាប់ទំនាក់ទំនងជាមួយ CTS SPORT