ខ្សែប្រយុទ្ធ Timer Werner ឡើងជើងវិញហើយនៅពេលបានផ្លាស់ទៅលេងនៅក្រុម RB Leipzig ដោយយប់មិញនេះ រូបគេរកបាន៣គ្រាប់ម្នាក់ឯងក្នុងការប្រកួតដែលយកឈ្នះលើក្រុម Teutonia Ottensen ក្នុងលទ្ធផល ៨-០។
មែនទែនទៅ Teutonia Ottensen ជាក្រុមមិនមានលទ្ធភាពក្នុងការប្រជែងជាមួយក្រុម RB Leipzig នោះទេ ព្រោះពួកគេស្ថិតនៅលីគលំដាប់ទី៤ឯណោះ។ តែអ្វីដែលគេចាប់អារម្មណ៍ក្នុងការប្រកួតនេះផងនោះ គឺវត្ដមានរបស់ខ្សែប្រយុទ្ធ Werner ផ្ទាល់តែម្ដង ដែលប្ដូរចេញនៅនាទី៥៧ ហើយរកបានដល់ទៅ៣គ្រាប់ម្នាក់ឯង។ កីឡាករអាល្លឺមឺង់រូបនេះ តាំងពីផ្ទេរមកពីក្រុម Chelsea វិញមក ឃើញថាគេមានទម្រង់លេងឡើងជើងវិញហើយ។
គិតតាំងពីផ្លាស់មកលេងនៅអាល្លឺម៉ង់វិញនេះ ខ្សែប្រយុទ្ធជម្រើសជាតិខាងលើរកបាន៤គ្រាប់ និងបញ្ជូនបាល់ឱ្យមិត្តរួមក្រុមបាន២គ្រាប់ផងដែរ ក្នុងការបង្ហាញខ្លួន៤ប្រកួត។ ខណៈដែលអំឡុងពេល២ឆ្នាំនៅក្រុម Chelsea វិញ រូបគេលេងមិនបានល្អសោះ និងស្ទើរតែមិនមានឱកាសរកគ្រាប់បាល់ផង៕