ក្រុម FC Barcelona កំពុងឈឺក្បាលចំពោះកីឡាករជាច្រើននាក់ដែលបានដាក់លក់ក្នុងទីផ្សារដោះដូរកីឡាករទៅហើយ ប៉ុន្តែមិនមានអ្នកចាប់អារម្មណ៍ទាល់តែសោះ។
ទីផ្សារដោះដូរកីឡាករនឹងបិទបញ្ចប់ឆាប់ៗនេះហើយ ប៉ុន្តែក្រុម Barcelona នៅមានសមាជិកដែលត្រូវលក់ចេញច្រើននាក់ទៀត ហើយគ្មានក្រុមណាទាក់ទងមកចង់បានទាល់តែសោះ។ ជាក់ស្ដែងសមាសភាពទាំងអស់នោះរួមមាន Pjanic, Aubameyang, Memphis, Dest និង Braithwaite ជាដើម។ កីឡាករទាំង៥នាក់នេះ ត្រូវបាន ក្រុមអ្នកមានបុណ្យដាក់លក់តាំងពីបើករដូវកាលដោះដូរកីឡាករភ្លាមម្ល៉េះ ប៉ុន្តែនៅមិនទាន់អាចបញ្ចេញសោះ។
ការមិនអាចលក់ពួកគេបាននេះហើយ នឹងធ្វើឱ្យសមាជិកក្នុងក្រុមច្រើននាក់មិនអាចលេងនោះទេ ហើយការចង់បានកីឡាករថ្មីក៏មិនអាចឡើងបានដែរ។ មួយវិញទៀត ពួកគេនឹងត្រូវបន្ដនៅក្លឹប ហើយប្រាក់ឈ្នួលក៏នៅបើកធម្មតាដដែល ដែលធ្វើឱ្យក្រុម Barcelona អាចនិយាយបានថាចំណាយប្រាក់ចោលមិនខាន៕