បងប្រុស Mathias របស់ Pogba បានបង្កភាពចម្រូងចម្រាសយ៉ាងខ្លាំងនៅលើអ៊ីនធឺណិត នៅពេលដែលគាត់បានចេញវីដេអូរយៈពេល ៣នាទី ដែលគាត់បានសន្យាថានឹងបង្ហាញព័ត៌មាន “ផ្ទុះកក្រើក” មួយចំនួនអំពីបងប្អូនបង្កើតរបស់គាត់គឺ Pogba។
ប៉ុន្តែព័ត៌មានលម្អិតបន្ថែមទៀតនៃរឿងដ៏គួរឲ្យភ្ញាក់ផ្អើលនេះបានលេចចេញមក។ យោងតាម France Info កីឡាករ Pogba បានជូនដំណឹងដល់ប៉ូលីសថា Mathias គឺជាផ្នែកមួយនៃក្រុមក្មេងទំនើងដែលបានប្រព្រឹត្តការប៉ុនប៉ងការចាប់ជំរិត។
Pogba អះអាងថា គាត់ត្រូវបានទទួលរងនូវការគំរាមកំហែង និងការប៉ុនប៉ងជំរិតទារប្រាក់ពីមិត្តភ័ក្តិដែលគាត់ស្គាល់គ្នាតាំងពីគាត់នៅក្មេង និងបងប្រុសរបស់គាត់។
គាត់ត្រូវបានគេនិយាយថាមានឧប្បត្តិហេតុលម្អិតមួយដែលគាត់ត្រូវបានបំភិតបំភ័យដោយបុរសពីរនាក់ដែលកាន់កាំភ្លើងវាយប្រហារនៅក្នុងផ្ទះល្វែងនៅទីក្រុងប៉ារីសហើយពួកគេបានទាមទារឱ្យគាត់ប្រគល់ប្រាក់ចំនួន ១៣លានអឺរ៉ូ។
គាត់បានបន្តបង្ហើបថាគាត់បានកាត់ផ្តាច់ទំនាក់ទំនងជាមួយក្រុមក្មេងទំនើងនោះម្តងរួចមកហើយ បន្ទាប់ពីគាត់បានរកឃើញថាមានបុគ្គលម្នាក់បានប្រើកាតឥណទានរបស់គាត់ដើម្បីលួចលុយចំនួន ២០០,០០០អឺរ៉ូ។
ផ្នែកតូចមួយរបស់ Mbappe នៅក្នុងរឿងនេះគឺថាក្រុមក្មេងទំនើងបានគម្រាមបង្កើតព័ត៌មានក្លែងក្លាយដែល Pogba បានស្នើសុំគ្រូអាបធ្មប់ធ្វើអំពើដាក់តារា PSG រូបនេះ។
នៅក្នុងសេចក្តីថ្លែងការណ៍មួយកាលពីថ្ងៃអាទិត្យ Pogba បាននិយាយថា៖ ការប្រកាសនាពេលថ្មីៗនេះរបស់ Mathias Pogba នៅលើប្រព័ន្ធផ្សព្វផ្សាយសង្គមមិនមែនជារឿងគួរឱ្យភ្ញាក់ផ្អើលនោះទេ។ ពួកគេកំពុងកើតឡើងបន្ទាប់ពីការគំរាមកំហែង និងការប៉ុនប៉ងជំរិតដោយក្រុមក្មេងទំនើងដែលបានរៀបចំប្រឆាំងនឹង Paul Pogba។
រឿងនេះត្រូវបានបញ្ជូនទៅអាជ្ញាធរទាំងនៅក្នុងប្រទេសអ៊ីតាលី និងនៅប្រទេសបារាំងកាលពីមួយខែមុន៕
ប្រភព៖ sportbible