តំបន់ត្រីកោណរបស់ក្លឹប Real Madrid មានខ្សែបម្រើការពារ Casemiro អមនឹងបម្រើខាងលើ Toni Kroos ក៏ដូចជា Luka Modric ទីបំផុតកំពុងត្រូវបានបានបំបែក ដោយការអូសទាញពីសំណាក់ក្លឹបយក្ស Manchester United តាមរយៈការចរចា នាំយកវត្តមានកីឡាករប្រេស៊ីល ចេញពីទឹកដីអេស្ប៉ាញ។
ដំណើរការចរចាស្ថិតនៅភាគរយខ្ពស់ រៀបនឹងសម្រេចក្នុងចន្លោះពេល ៤៨ ម៉ោងបន្ទាប់ ហើយបើតាមរបាយការណ៍ពី Fabrizio Romano បានឲ្យដឹងថា United បានដាក់សំណើទឹកប្រាក់ ៦០ លានអឺរ៉ូ បូកកិច្ចព្រមព្រៀងផ្សេងៗ ១០ លានអឺរ៉ូ ទៅកាន់ក្លឹបអាណាព្យាបាល ដើម្បីថ្ពក់យកបុរសវ័យ ៣០ ឆ្នាំ។
បើការឆ្លើយតបពីសំណាក់ក្លឹបក្នុងទីក្រុង Madrid ជាចម្លើយវិជ្ជមាន យល់ព្រម នៅតម្លៃខាងលើ នោះកីឡាករប្រាកដនឹងឈានដល់ដំណាក់កាលតេស្តសុខភាពត្រឹមយប់នេះ ឬក៏យប់ស្អែក ហើយប្រកាសវត្តមានផ្លូវការយ៉ាងយូរត្រឹមចុងសប្តាហ៍ រួចក៏ទំនងត្រៀមលក្ខណៈទាន់ពេលវេលា សម្រាប់ការប្រកួតទល់ Liverpool នៅវេលាម៉ោង ០២:០០ នាទីរំលងអាធ្រាត្រ ឈានចូលថ្ងៃអង្គារផងដែរ។
ទៅមើលលក្ខខណ្ឌបុគ្គល ដែលក្លឹបដឹកនាំដោយអ្នកចាត់ការលោក Erik ten Hag ផ្តល់ឲ្យ Casemiro គឺជាមួយកុងត្រាថ្មីសន្លាងរយៈពេល ៤ ឆ្នាំ មានសុពលភាពដល់ចុងខែមិថុនា ឆ្នាំ ២០២៦ អមនឹងសិទ្ធបន្តថ្មី ១ ឆ្នាំពីលើនោះ។ ខណៈដែលទំហំប្រាក់ពលកម្ម តាមសារព័ត៌មាន The Athletic ចុះផ្សាយថា United ក៏នឹងដំឡើងគុណជិត ១ ទ្វេជា ២ ធៀបនឹងប្រាក់ឈ្នួលនៅក្លឹប Real Madrid ពោលឡើងពី ១៨០ ០០០ ផោន មកកាន់ ៣៥០ ០០០ ផោន/សប្តាហ៍។
ទំហំនេះ នឹងរុញឲ្យចំណូលថ្មីលេងតំណែងបម្រើការពារ ឡើងឈរជាកីឡាករស៊ីថ្លៃបំផុតលំដាប់ទី ២ ប្រចាំក្លឹបម្ចាស់ដី Old Trafford ស្មើនឹងកម្រិតអ្នកចាំទី David de Gea ហើយនៅទាបជាងតែ Cristiano Ronaldo ម្នាក់គត់។
បន្តទៅមុខ អ្វីដែលអ្នកគាំទ្រចាប់អារម្មណ៍ចង់ឃើញបំផុត គឺចង់ឲ្យអ្នកចាត់ការសញ្ជាតិហូឡង់ រៀបចំប្រើប្រាស់អតីតកីឡាករ Real Madrid ទាំង ៣ រូប តាំងពីក្រោមដល់លើ ពោលដូចការប្រើ Raphael Varane នៅការពារកណ្ដាល អម Casemiro នៅបម្រើការពារ និង Cristiano Ronaldo នៅប្រយុទ្ធកណ្ដាល។
ចុងក្រោយងាកទៅស្ថានភាពក្លឹបអេស្ប៉ាញបន្តិច ក៏មិនបញ្ចប់ការដោះដូរត្រឹមប៉ុណ្ណឹងដែរ ដោយប្រសិនណាលក់ដាច់ Casemiro ទៅឲ្យ United នោះពួកគេនឹងបង្វិលលុយទៅចរចាគោលដៅអាទិភាពនៅឯក្លឹប Newcastle United គឺកីឡាករ Bruno Guimaraes។
ក្លឹបដឹកនាំដោយលោក Carlo Ancelotti ចង់នាំយកបុរសវ័យ ២៤ ឆ្នាំ សញ្ជាតិប្រេស៊ីល មកដុសខាត់ឲ្យក្លាយជា “Casemiro ទីពីរ” បើទោះបីដឹងថា Newcastle ទើបតែទិញបានកាលពីរដូវរងា ដើមឆ្នាំក៏ដោយ។ តាមហាងឆេងតម្លៃខ្លួន អាចជាតម្រូវឲ្យ Real Madrid ចាយលុយល្បាក់ ៣៥ ទៅ ៤៥ លានអឺរ៉ូ លើការផ្ទេរចូល តែវាក៏ស៊ីសងអុតមើលចម្លើយពីភាគីក្លឹប Newcastle និងកីឡាករផ្ទាល់ផងដែរ។ រំឭកឲ្យដឹងថា កាលបរិច្ឆេទទីផ្សារដោះដូររដូវក្តៅ នឹងសម្រេចបិទទ្វារនៅថ្ងៃទី ៣១ សីហាខាងមុខ៕
ប្រភព៖ បរទេស