កីឡាករជាច្រើនកំពុងខិតខំខ្លាំង នៅការបង្ហាញទម្រង់លេងតាមបណ្តាក្លឹបនានា ដើម្បីជាការទាក់ចិត្តអ្នកចាត់ការក្រុមជម្រើសជាតិ ឲ្យផ្តល់ឱកាស ទៅចូលរួមតំណាងជម្រើសជាតិ សម្រាប់ព្រឹត្តិការណ៍ខ្នាតយក្ស FIFA World Cup ២០២២ ខាងមុខ។
នៅសល់តែ ៣ ខែទៀតប៉ុណ្ណោះ World Cup ដែលកាតារធ្វើជាម្ចាស់ផ្ទះ ក៏នឹងចូលមកដល់ ហើយងាកទៅខ្សែបម្រើឆ្នើម Bernardo Silva នៃក្លឹប Manchester City ក៏បានទស្សន៍ទាយទុកជាមុន នូវចំណោមក្រុមទាំង ៨ មានសង្ឃឹមខ្ពស់អាចឈ្នះពានរង្វាន់សារនេះ។
នៅបទសម្ភាសន៍ជាមួយ ESPN កីឡាករវ័យ ២៨ ឆ្នាំ បាននិយាយថា៖ “យើងនឹងព្យាយាម ដើម្បីឆ្ពោះទៅដណ្ដើមពាន World Cup ក៏ប៉ុន្តែវាមិនជារឿងងាយទេ ណាមួយក៏មានក្រុមល្អៗ ដែលសង្ឃឹមខ្ពស់ផ្សេងទៀត ដូចជាអាល្លឺម៉ង់, អាហ្សង់ទីន, ប្រេស៊ីល, បារាំង, អេស្ប៉ាញ, ហូឡង់ និងអង់គ្លេស ទោះជាយ៉ាងណា យើងនឹងធ្វើឲ្យបានល្អបំផុត ព្រោះយើងបណ្ដុំទៅដោយកីឡាករល្អៗជាច្រើន”។
Silva បន្តទៀតថា៖ “នេះវាខុសពី Premier League មិនមែនយើងមើលតែ ៤ ឬ ៥ ក្រុម អាចទាយដឹងទុកមុនទេ នៅ World Cup វាពិតជាពិបាកទស្សន៍ទាយខ្លាំងណាស់ ក្រៅតែពីចំណោមក្រុមខាងលើ ក៏មានក្រុមផ្សេងទៀត ដែលយើងមិនអាចដឹងមុន ថាពួកគេនឹងធ្វើបានល្អដល់កម្រិតណា”។
តែយ៉ាងណាសម្រាប់មតិអ្នកគាំទ្រភាគច្រើន ដែល CTS SPORT បានវាស់ស្ទង់កន្លងមក គឺរមែងចុចឈ្មោះក្រុមជម្រើសជាតិព័រទុយហ្គាល់ ឬអាហ្សង់ទីន តែពីរប៉ុណ្ណោះ ដែលចង់ឲ្យឈ្នះពាន World Cup បំផុត ព្រោះអី ពួកគេនឹងពិតជាមានភាពសោកស្ដាយ ប្រសិនណាចំណោមកីឡាករល្អបំផុតគ្រប់ពេលវេលាគឺ Cristiano Ronaldo ឬ Lionel Messi ត្រូវចូលនិវត្ត ដោយមិនបានកាន់ពានលំដាប់ពិភពលោកមួយនេះ។
ដោយឡែកបន្តទៅរឿងរ៉ាវរបស់ Silva យើងក៏សូមភ្ជាប់ទៅកាន់ចចាមអារ៉ាមពាក់ព័ន្ធនឹងអនាគតមិនប្រាកដប្រជា ដែលគ្រប់គ្នាកំពុងចាំអ៊ុតមើល នៅកំឡុងកាលបរិច្ឆេទទីផ្សារដោះដូរ កំពុងបើកទ្វារពីរសប្ដាហ៍ទៀតនេះ។ អតីតសមាជិកក្លឹប Monaco បានស្ថិតក្រោមរ៉ាដាចង់បាន របស់ក្លឹបអេស្ប៉ាញ Barcelona តែខាងក្លឹបមេ City ហាក់មិនបើកផ្លូវទាល់តែសោះ។
ក៏មិនច្បាស់ថា កីឡាករគិតគូរសម្រេចចិត្តបែបណាដែរ ដ្បិតអីសុពលភាពកុងត្រានៅសេសសល់ដល់ចុងខែមិថុនា ឆ្នាំ ២០២៥។ ខ្សែបម្រើប្រយុទ្ធ ជំនាញជើងឆ្វេង ហាក់ទទួលបានការចាប់ចិត្តពីអ្នកចាត់ការលោក Xavi Hernandez តែភាគីខាងក្លឹបលោក Pep Guardiola បានព្យាយាមឃាត់ឃាំង និងដាក់តម្លៃកប់ពពក ដល់ ១០០ លានអឺរ៉ូ ជាកំហិត។ នេះជាទំហំចំណេញ ១ ទ្វេជា ២ ធៀបនឹងគ្រានាំយកពីក្លឹបបារាំង នៅតម្លៃ ៥០ លានអឺរ៉ូ។
Silva រាប់បានថាជោគជ័យក្រាស់ក្រែលណាស់ទៅហើយជាមួយក្រុមមេឃខៀវ ជាពិសេសពានរង្វាន់ធំតូចនានានៅលីគកំពូលអង់គ្លេស។ សរុបការបង្ហាញខ្លួន ២៥៣ ប្រកួត រកបាន ៤៨ គ្រាប់និង Assist ៥០ លើក ហើយសមិទ្ធផលធំដែលរំលងមិនទាន់សម្រេចបាន គឺពានរង្វាន់ UEFA Champions League ដែលប្រហែលកីឡាករគិតចង់ទៅលើកនៅ Barcelona ក៏ថាបាន៕
ប្រភព៖ បរទេស