ខ្សែប្រយុទ្ធ Timo Werner បានផ្លាស់ទៅលេងនៅក្រុម RB Leipzig វិញហើយ ក្រោយពីលេងនៅក្រុមតោខៀវ Chelsea មិនបានល្អសោះនៅប៉ុន្មានរដូវកាលមកនេះ។
ក្រុម Chelsea បានទិញ Werner មកកាលពី២ឆ្នាំមុនក្នុងតម្លៃខ្លួនប្រមាណជា៤៧លានផោន។ តែវត្ដមានរបស់កីឡាករអាល្លឺម៉ង់នេះនៅអង់គ្លេស មិនគាប់ប្រសើរឡើយ រូបគេតែងបានឱកាសលេងជម្រើសដំបូងជានិច្ច ប៉ុន្តែមិនអាចរកគ្រាប់បាល់ជួយក្រុមបានច្រើននោះទេ។ រហូតដល់រដូវកាលនេះ ក្រុមរបស់លោក Thomas Tuchel ក៏សម្រេចចិត្តលក់គេចេញវិញទៅឱ្យក្រុមចាស់ Leipzig ដដែលក្នុងតម្លៃខ្លួនប្រមាណជា២៥លានផោនប៉ុណ្ណោះ។
នៅពេលនេះ Werner បានទៅដល់ទឹកដីអាល្លឺម៉ង់ហើយ ដើម្បីត្រៀមពិនិត្យសុខភាពមុនពេលបង្ហាញខ្លួនជាផ្លូវការ។ កីឡាករវ័យ២៦ឆ្នាំរូបនេះ រំពឹងថាការបង្ហាញខ្លួននឹងធ្វើឡើងឆាប់ៗដើម្បីបានជួយក្រុមលេងនៅក្របខណ្ឌ Bundesliga ៕