ខ្សែប្រយុទ្ធ Vinicius Junior បាននិយាយថាខ្លួនចង់ឈ្នះពានរង្វាន់ UEFA Champions League ៥ទៅ៦ដងជាមួយក្រុម Real Madrid ក្នុងអាជីពបាល់ទាត់របស់ខ្លួន។
កីឡាករប្រេស៊ីលខាងលើបានជួយក្រុម Real Madrid ឈ្នះពានរង្វាន់ UEFA Champions League ម្ដងមកហើយកាលពីរដូវកាលមុននេះ ក្រោយពីយកឈ្នះលើក្រុម Liverpool នៅលើទឹកដីបារាំង។ យ៉ាងណាមិញ ក្រោយពីធ្វើបានល្អហើយ រូបគេក៏ទទួលបានកុងត្រាថ្មីបន្ថែមទៀតពីក្រុមអធិរាជសផងដែរ។ ដោយរំពឹងថារូបគេនឹងអាចលេងឱ្យក្រុមនេះជាច្រើនឆ្នាំទៅមុខទៀត។
ខ្សែប្រយុទ្ធវ័យ២២ឆ្នាំខាងលើបាននិយាយថា៖ “វាពិតជាសំខាន់ក្នុងការព្យាយាមឈ្នះការប្រកួតឱ្យបានច្រើនតាមដែលអាចធ្វើទៅបាន។ យើងនឹងធ្វើគ្រប់យ៉ាងដើម្បីសម្រេចក្ដីបំណងឈ្នះពានរង្វាន់ ហើយវាជា DNA របស់ក្លឹបយើងហើយ។ ខ្ញុំចង់លេងនៅក្លឹបនេះជាច្រើនឆ្នាំហើយ ហើយច្បាស់ណាស់ខ្ញុំចង់ឈ្នះពានរង្វាន់ជាច្រើននៅទីនេះ។ ឈ្នះពាន Champions League ៥ទៅ៦ដងគឺជាអ្វីដែលគ្រប់គ្នាពាក់អាវ Real Madrid ចង់ធ្វើជានិច្ច”។
រំលឹកថាដើម្បីជាការបើករដូវកាលថ្មី ក្រុម Real Madrid នឹងត្រូវប្រកួតជាមួយក្រុម Eintracht Frankfurt នៅយប់ស្អែកនេះហើយ ក្នុងពានរង្វាន់ UEFA Super Cup ដែលជាពានប៉ះគ្នារវាងម្ចាស់ជើងឯក UEFA Champions League និង UEFA Europa League ៕