ក្រោយភ្លៀងមេឃស្រឡះ បន្ទាប់ពីរងពាក្យរិះគន់ជាហូរហែកាលពីប្រកួតទល់ Liverpool នៅឯពាន FA Community Shield ឥឡូវងាកមក ជំនួបបើកឆាក ក៏ដូចជាការបង្ហាញខ្លួនលើកដំបូងនៅ Premier League ស្រាប់តែគ្រាប់ពេជ្រ Erling Haaland បានសាងមុខមាត់ លុបអស់ពាក្យបន្ទោស ប្តូរមកវិញនូវពាក្យសរសើរ ទាំងពីសំណាក់អ្នកចាត់ការ និងអ្នកគាំទ្រ។
កីឡាករន័រវេស បានឈរជើងរយៈពេល ៧៨ នាទី នៅការប្រកួតទល់ក្លឹបញញួរធំ West Ham United កាលពីយប់មិញ ហើយក៏ជាអ្នករកបានគ្រាប់បាល់ជ័យជម្នះទាំងពីរគ្រាប់ កើតឡើងនៅនាទី ៣៦ និង ៦៥។ នេះជាគ្រាប់បាល់ផ្លូវការសម្រាប់ខ្សែប្រយុទ្ធវ័យ ២២ ឆ្នាំ ហើយក៏បានតាមស្មើកំណត់ត្រាអតីតជើងចាស់ Sergio Aguero ផងដែរ។
Haaland បានក្លាយជាកីឡាករបញ្ចប់ទី ២ គ្រាប់នៅប្រកួតដំបូង ក្នុងក្របខ័ណ្ឌ Premier League សម្រាប់ក្លឹប Man City ដែលក្នុងប្រវត្តិសាស្ត្រក្លឹបមេឃខៀវ មានតែកីឡាករ ២ រូបប៉ុណ្ណោះ អាចធ្វើបាន ដោយកាលពីខែសីហា ឆ្នាំ ២០១១ គឺជាខ្សែប្រយុទ្ធអាហ្សង់ទីន Aguero រកបាន ២ គ្រាប់ដូចគ្នា នៅជ័យជម្នះទៅលើក្លឹប Swansea។
ជាងនេះ ការស៊ុតបាល់ ១១ ម៉ែត្ររបស់គេ ក៏បានក្លាយជាកីឡាករទី ២ នៅ Premier League ដែលបង្ហាញខ្លួនប្រកួតដំបូង អាចបង្កើតឲ្យមានបាល់ពិន័យ ហើយជាអ្នកសម្រេចទីដោយខ្លួនឯង ខកខានកើតមានកាលពីខែមេសា ឆ្នាំ ២០១៦ គ្រាកីឡាករ Alexandre Pato អតីតសមាជិក Chelsea ធ្វើបានគ្រាប៉ះ Aston Villa។
ដោយមើលឃើញនូវការខិតខំ និងជម្នះអស់ពាក្យរិះគន់ជាច្រើន ក៏អ្នកចាត់ការលោក Pep Guardiola បានលាន់មាត់សរសើរកូនប្រុសបង្កើតលោក Alf-Inge Haaland ថាពេលឥឡូវនេះ អាចធៀបនឹងកម្រិតវីរបុរសមួយចំនួនបានហើយ។ គ្រូសញ្ជាតិអេស្ប៉ាញ និយាយប្រាប់ Sky Sports៖ “ខ្ញុំដឹងថា Haaland បានឆ្លងកាត់ការរិះគន់ជាច្រើននៅសប្តាហ៍កន្លងមកនេះ តែយ៉ាងណាមើលទៅគេ គឺចិត្តត្រជាក់ណាស់ ហើយនៅបន្តព្យាយាមហ្វឹកហាត់បានយ៉ាងល្អ”។
លោកបន្តទៀតថា៖ “ខ្ញុំមានការពេញចិត្តជាខ្លាំង នូវរបៀបដែលគេអង់អាចក្នុងការដើរសំដៅទៅយកបាល់មកស៊ុតប៉េណាល់ទី ព្រោះគេមើលទៅមានជំនឿជាក់ ច្បាស់លាស់នឹងខ្លួនឯង ដែលនេះ រាប់ថាគេអាចចាប់ផ្តើមសម្របនឹង Premier League បានហើយ ឥឡូវដល់ពេលយើងអាចដាក់ឈ្មោះ គេនូវកម្រិតកីឡាករល្អៗដូចជា Thierry Henry, Alan Shearer និង Cristiano Ronaldo”។
“Haaland នៅសល់ពេល ៥ ឆ្នាំទៀត យើងសង្ឃឹមថាគេនឹងបន្តរីករាយជាមួយក្លឹបទាំងមូល ហើយអាចបន្ថែមការរកគ្រាប់បាល់ និងវិវត្តខ្លួនទៅជាកីឡាករដ៏ល្អប្រសើរម្នាក់”។ គួររំឭកថា កំណត់ត្រាការរកគ្រាប់បាល់ច្រើនបំផុតនៅ Premier League សព្វថ្ងៃគ្រោងដោយឈ្មោះ Alan Shearer ធ្វើបាន ២៦០ គ្រាប់ Wayne Rooney បាន ២០៨ គ្រាប់ និង Andy Cole បាន ១៨៧ គ្រាប់ ដូច្នេះសម្រាប់ Haaland ដែលទើបរកបាន ២ គ្រាប់ថ្មីថ្មោង គឺត្រូវការ ២៥៨ គ្រាប់ទៀត ដើម្បីតាមស្មើ ចុះអ្នកគិតថា ពេលវេលា ៥ ឆ្នាំសម្រាប់កីឡាករខាងលើ អាចគ្រប់គ្រាន់នឹងសម្រេចបានដែរឬទេ ឬក៏ត្រូវការពេលយូរជាងនេះ?
ប្រភព៖ បរទេស