Roy Keane បានបង្ហាញការខកចិត្តជាខ្លាំង អំពីការដឹកនាំនៅជុំដំបូង ដែលក្លឹបចាស់ខ្លួនគឺ Manchester United បរាជ័យក្រោមថ្វីជើង Brighton ១-២ ហើយបានសង្កត់ធ្ងន់ថា Anthony Martial មិនមែនជាចម្លើយ ក្នុងការមកបំពេញកន្លែង Cristiano Ronaldo នោះទេ។
យប់មិញលោក Erik ten Hag បានដាក់ Christian Eriksen ឲ្យលេងជាប្រយុទ្ធក្នុងប្រអប់នៅជម្រើសដំបូង ដែលគេជឿថា បើ Martial មិនរបួសម្ល៉េះកីឡាករបារាំងប្រាកដបានតំណែងនោះមិនខាន ហើយ Cristiano Ronaldo នៅអង្គុយបម្រុងដូចការគិតទុកជាមុន។
ឆ្លើយតបពាក់ព័ន្ធនឹងរឿង Martial លោក Keane ប្រាប់ទៅប៉ុស្តិ៍ Sky Sports បែបនេះ៖ “អ្នកអត់អាចឲ្យ Ronaldo ចាកចេញ ហើយត្រឹមគិតថា Martial ជាចម្លើយដែលអាចមកបំពេញចន្លោះបានឡើយ និយាយរួម Martial មិនសក្តិសមនោះទេ បើទោះបីគេល្អនៅប្រកួតត្រៀមបើករដូវកាលក៏ដោយ ខ្ញុំទទួលស្គាល់”។
លោកបន្ត៖ “ខណៈពេលនេះ ក្លឹបធ្វើអត់បានល្អទេ ហើយក៏អត់មានជម្រើសច្រើនដែរ តែគ្រប់យ៉ាងនឹងផ្លាស់ប្ដូរនៅពេលបន្ទាប់ ទោះជាយ៉ាងណាអ្នកត្រូវរក្សាទុក Ronaldo ដោយមិនអាចឲ្យគេចាកចេញទៅបានទេ ព្រោះយើងគ្មានផ្លូវបម្រុងទុកនៅឡើយ”៕
ប្រភព៖ Sky Sports