ត្រលប់ទៅជាង ២ ឆ្នាំមុន ប្រិយមិត្តប្រាកដធ្លាប់ដឹងរឿងរ៉ាវដែល Lionel Messi បង្ហាញការកោតសរសើរដល់សមត្ថភាពខ្សែបម្រើក្រូអាត Marcelo Brozovic ហើយចង់ឲ្យក្លឹប Barcelona ចរចាយកមកទឹកដី Camp Nou កាលនោះ តែយ៉ាងណាមិនទទួលបានផ្លែផ្កាជោគជ័យអ្វីឡើយ។
ដល់ឥឡូវក្លឹបហង្សក្រហម Liverpool ឯណេះ ក៏បើកការចាប់អារម្មណ៍ទៅលើកីឡាករវ័យ ២៩ ឆ្នាំផងដែរ ហើយសម្លឹងចង់នាំយកខ្សែបម្រើខាងលើ មុនទីផ្សារដោះដូរបិទទ្វារនាថ្ងៃទី ០១ កញ្ញាខាងមុខ។ បើតាមសារព័ត៌មាន The Mirror ចុះផ្សាយថា ក្លឹប Liverpool គិតគូរចង់ដោះដូរកីឡាករស្មើ ដោយដាក់ឈ្មោះ Naby Keita ឬ Robert Firmino ឲ្យទៅក្លឹប Inter Milan ជាភាគីក្លឹបអាណាព្យាបាលធ្វើការពិចារណា។
យ៉ាងណាយើងមិនទាន់ដឹងចម្លើយថាបែបម៉េចទេ ដ្បិតអីទាំង Keita, Firmino គឺសុទ្ធសឹងជាកីឡាករត្រៀមផុតកុងត្រានៅ ១២ ខែបន្ទាប់ ខណៈ Brozovic សល់កុងត្រាយូរ ដល់ចុងខែមិថុនា ឆ្នាំ ២០២៦។ ការដែលចង់បានវត្តមានកីឡាករក្រូអាតបន្ថែម ក៏ដោយសារមើលឃើញពីកង្វះខាតនៅតំបន់ស្នូល ក្រោយកីឡាករមួយចំនួនរងរបួស ជាបន្តបន្ទាប់។ ចាយពេលជាមួយ Inter ជាង ៦ ឆ្នាំ ខ្សែបម្រើខាងលើ រកបាន ២៨ គ្រាប់និង Assist ៣៧ លើក នៅ ២៨៩ ប្រកួតសរុប៕
ប្រភព៖ The Mirror