អ្នកចាត់ការលោក Thomas Tuchel បានបញ្ជាក់ជាផ្លូវការ ថាក្លឹបបានព្រមព្រៀងការអនុញ្ញាតឲ្យ Marcos Alonso ចាកចេញទៅហើយ បើទោះបីនៅសេសសល់សុពលភាពកុងត្រារយៈពេល ១២ ខែទៀតក្តី។ នេះទំនងជាពាក់ព័ន្ធនឹងការផ្ទេរទៅចូលរួម នៅក្លឹប Barcelona។
កីឡាករសញ្ជាតិអេស្ប៉ាញ មានដំណឹងថា លោក Xavi Hernandez ជាគ្រូអ្នកមានបុណ្យបានទាក់ទង និងចង់បានឲ្យទៅចូលរួមមុនការចាប់ផ្តើមរដូវកាលថ្មី។ ទន្ទឹមនឹង Chelsea ទើបយកបាន Marc Cucurella ផង អ៊ីចឹងរឿងរ៉ាវ Alonso ពិតណាស់ ដូចរកបានអ្នកជំនួសរួចរាល់។
អ្នកចាត់ការសញ្ជាតិអាល្លឺម៉ង់ បានលើកឡើងបន្ទាប់ការយកឈ្នះ Everton ១-០ កាលពីយប់មិញ៖ “រឿងហ្នឹង គឺត្រង់ Alonso គេព្យាយាមចង់ចាកចេញ ហើយក្លឹបក៏ព្រមតាម ដូច្នេះវាគ្មានហេតុផលអ្វី ត្រូវមានវត្តមានគេលើទីលាននៅថ្ងៃនេះទេ ទាំងអស់ជារឿងត្រឹមត្រូវដែលយើងបានធ្វើ”។ បើតាមចចាមអារ៉ាមលឺថា Chelsea ទំនងចង់ដាក់ឈ្មោះខ្សែការពារស្លាប ថែមលុយ ៧០ លានអឺរ៉ូ ដើម្បីប្តូរយក Frenkie de Jong តែការឆ្លើយតបបែបណាពីសំណាក់ភាគីក្លឹបអេស្ប៉ាញ យើងមិនទាន់ទទួលបាននៅឡើយ៕
ប្រភព៖ Sportsmole