Isco Alarcon បានផុតកុងត្រាក្លាយជាកីឡាករឥតតម្លៃផ្ទេរលើទីផ្សារដោះដូរ ហើយបើតាមស្ថានភាពចុងក្រោយ កីឡាករអេស្ប៉ាញទំនងនឹងរកបានទ្រនំថ្មីជ្រកកោន ពោលបន្តនៅក្របខ័ណ្ឌ La Liga ដដែល នោះគឺជាមួយក្លឹប Sevilla។
អ្នកចាត់ការលោក Julen Lopetegui ហាក់ចាប់ចិត្តលើគុណភាពខ្សែបម្រើខាងលើជាខ្លាំង ដោយបានស្នើម្តងហើយម្តងទៀត ទៅថ្នាក់លើគឺនាយកជាន់ខ្ពស់លោក Monchi ឲ្យសម្រេចការចរចានាំយក Isco មុនការចាប់ផ្តើមរដូវកាលថ្មី ប្រសិនអាចធ្វើបាន។ ឥឡូវនេះ ភ្នាក់ងារលោក Jorge Mendes និងភាគីក្លឹប Sevilla បាននឹងកំពុងចរចាយ៉ាងសកម្ម ដោយជឿថា តម្រុយវិជ្ជមានក៏នឹងត្រៀមលេចចេញមកនៅពេលដ៏ខ្លីខាងមុខ។
តាមដឹង Isco ក៏នឹងព្រមទទួលយកការកាត់បន្ថយថ្លៃពលកម្មផងដែរ ព្រោះទទួលស្គាល់គ្មានក្លឹបណា អាចបន្តផ្តល់ឲ្យនូវថ្លៃឈ្នួល ខ្ពស់ដូចកាលនៅក្លឹប Real Madrid ឡើយ បន្ទាប់ពីអាយុក៏កាន់តែចំណាស់ ហើយរបួសក៏សង្កេតឃើញកើតឡើងច្រើននៅពេលចុងក្រោយឲ្យក្លឹបស្តេចស។ បើការចរចាសម្រេចបាននៅប៉ុន្មានថ្ងៃបន្ទាប់ នោះថាមិនត្រូវ ខ្សែបម្រើខាងលើ ទំនងនឹងអាចចូលរួមការប្រកួតបើកឆាកនាចុងសប្តាហ៍ កំណត់ត្រូវជួប Osasuna នាវេលាម៉ោង ០២:០០ នាទីរំលងអាធ្រាត្រ ឈានចូលថ្ងៃទី ១៣ សីហា៕
ប្រភព៖ BeSoccer