ក្រុម Real Madrid បានបរាជ័យក្រោមថ្វីជើង Sevilla ក្នុងលទ្ធផល ៣-២ កាលពីយប់មិញនេះ ក្នុងពានរង្វាន់ La Liga ។
ក្នុងការប្រកួតយប់មិញនេះ គេឃើញថាក្រុម Real Madrid បានដាក់កីឡាករក្មេងៗចូលលេងច្រើនជាងពាក់កណ្ដាលក្រុមទៅហើយ។ ដោយនេះជាយុទ្ធសាស្ត្រមួយសម្រាប់លោក Zidane ដែលមានទំនុកចិត្តចំពោះកូនក្រុម និងទុកកីឡាករសំខាន់ខ្លះដើម្បីត្រៀមលេង UEFA Champions League វគ្គផ្ដាច់ព្រ័ត្រ។
លោក Zidane បាននិយាយក្រោយចាញ់ក្រុម Sevilla ថា៖ “នេះជាក្រុមទី២ ដែលខ្ញុំបានរៀបទុក និងមានទំនុកចិត្តលើពួកគេ។ ខ្ញុំមិនស្ដាយក្រោយក្នុងការដាក់ឱ្យពួកគេលេងឡើយ។ នៅសល់២ប្រកួតទៀត ហើយនេះជាឱកាសសម្រាប់ពួកគេបានលេង បញ្ចេញសមត្ថភាព។ ខ្ញុំដឹងពួកគេលេងបានតិចណាស់នៅរដូវកាលនេះ ប៉ុន្តែពួកគេធ្វើបានល្អដោយអាចរកបានគ្រាប់បាល់ដែរ”។
Real Madrid ស្ថិតនៅចំណាត់ថ្នាក់លេខ៣ក្នុងតារាង La Liga ដោយមាន៧២ពិន្ទុ ស្របពេលក្រុមលេខ៤ Valencia មាន៦៧ពិន្ទុ។ ការប្រកួតនៅសល់២ប្រកួតទៀតនឹងបញ្ចប់រដូវកាល ហើយតាមលទ្ធផលនេះ Real Madrid មានកៅអីលេង UCL ឆ្នាំក្រោយរួ៏ចជាស្រេចហើយ៕
