ខ្សែប្រយុទ្ធ Sadio Mane បានអះអាងថាប្រសិនបើក្រុម Bayern Munich ប៉ះក្រុម Liverpool នៅពានរង្វាន់ UEFA Champions League នោះក្រុមរបស់ខ្លួននឹងអាចយកឈ្នះបានមិនខាន។
Mane បានចាកចេញពីក្រុម Liverpool មកលេងឱ្យក្រុម Bayern Munich វិញនារដូវកាលថ្មីនេះ ដោយមានកុងត្រារយៈពេល៣ឆ្នាំ។ មកលេងនៅអាល្លឺម៉ង់នេះដែរ Mane ទទួលបានការផ្ដល់ទំនុកចិត្តខ្លាំង ហើយក៏សាមីខ្លួនធ្វើបានល្អផងដែរ ក្នុងការប្រកួតមិត្តភាពកន្លងមកនេះ ដោយរកគ្រាប់បាល់ជួយក្រុមបាន។ ដោយឡែកនារដូវកាលថ្មីខាងមុខនេះ គេក៏មានគោលដៅដើម្បីយកពានរង្វាន់មកឱ្យក្លឹបផងដែរ ជាពិសេសនៅក្របខណ្ឌ UEFA Champions League។
កីឡាករសេណេហ្គាល់បានអះអាងបន្ថែមថានៅពានរង្វាន់ UCL នេះសុទ្ធតែក្រុមមានសមត្ថភាពទើបអាចចូលលេងបាន។ មួយវិញទៀត ក្រុម Bayern Munich របស់ខ្លួនក៏អាចមានឱកាសបានជួបក្រុម Liverpool ដែលជាក្រុមអតីតរបស់គេផងដែរ។ តែបើសិនជាវាកើតឡើងមែន នោះច្បាស់ណាស់ Mane មានទំនុកចិត្តថានឹងអាចយកឈ្នះជើងខ្លាំងរបស់អង់គ្លេសបាន៕
https://www.dailymail.co.uk/sport/football/article-11082385/Sadio-Mane-wont-hold