លោក Erik ten Hag បានបង្ហាញអារម្មណ៍មិនសប្បាយចិត្តនោះទេ ចំពោះករណីដែលមានកីឡាករ Manchester United ដើរចេញពីទីលាន ទាំងដែលការប្រកួតទល់ Rayo នៅមិនទាន់បញ្ចប់ផងនោះ។
រំលឹកថាការប្រកួតមិត្តភាពចុងក្រោយរបស់បិសាចក្រហមនៅទឹកដី Old Trafford ទល់ក្រុម Rayo កន្លងទៅនេះបានបញ្ចប់ក្នុងលទ្ធផលស្មើគ្នា ១-១។ តែអ្វីដែលកើតឡើងក្រៅពីការប្រកួតនោះគឺមានកីឡាករ Man Utd មួយចំនួន មានទាំង Cristiano Ronaldo ផងនោះ បានដើរចេញពីទីលានទាំងដែលការប្រកួតនៅមិនទាន់បញ្ចប់ផង។ រឿងនេះគឺអ្នកគាំទ្រជាអ្នកថតបានផ្ទាល់តែម្ដង ពេល Ronaldo ស្ពាយកាតាបដើរចាកចេញទៅ។
ទាក់ទងទៅនឹងសកម្មភាពបែបនេះដែរ លោក Ten Hag បានអះអាងថាវាជារឿងមិនអាចទទួលយកបាននោះទេ។ អាកប្បកិរិយារបស់កីឡាករគ្រប់គ្នាគឺជារឿងសំខាន់ ហើយក៏ត្រូវតែផ្ដល់ការគោរពទៅដល់ដៃគូប្រកួតផងដែរ។ គ្រប់គ្នា ត្រូវតែនៅរហូតដល់ចប់ការប្រកួត ដើម្បីជាការចូលរួមលើកទឹកចិត្តគ្នាទៅវិញទៅមក៕