បំណងចង់ចាកចេញពីក្លឹប បន្ទាប់មិនមានកៅអីលេងនៅ Champions League គឺជាអ្វីដែលត្រូវបានគេលើកឡើងពាសពេញបណ្តាញសង្គមអ៊ិនធឺណេតនៅពេលដែលគេនិយាយពីតារាឆ្នើមបិសាចក្រហម Cristiano Ronaldo នាពេលថ្មីៗនេះ។
គាត់មិនបានធ្វើដំណើរជាមួយក្រុមទៅចូលរួមប្រកួតមុនបើករដូវកាលនៅប្រទេសថៃ និងអូស្ត្រាលីនោះទេ។ ការប្រកួតមុនបើករដូវកាលតែមួយគត់ ដែលគាត់បានលេង នោះគឺទល់នឹងក្រុម Rayo Vallecano។
ជាមួយនឹងអនាគតដែលមិនទាន់ដោះស្រាយរួចរាល់នៅឡើយនោះ ពេលនេះ Premier League នឹងចាប់ផ្តើមរដូវកាលថ្មី ២០២២–២០២៣ នៅចុងសប្តាហ៍នេះ ខណៈដែល Brighton នឹងធ្វើដំណើរទៅជួបក្រុម Man United នៅ Old Trafford នៅថ្ងៃអាទិត្យ។
កាសែត Daily Mail បានរាយការណ៍ថា Ronaldo មិនស្ថិតនៅក្នុងផែនការរបស់ Erik ten Hag ដើម្បីចូលលេងប្រកួតថ្ងៃបើកឆាក Premier League នោះទេ។ ផ្ទុយទៅវិញ អ្នកចាត់ការទូទៅសញ្ជាតិហូឡង់រូបនេះ កំពុងសម្លឹងឃើញកីឡាករ Jadon Sancho, Anthony Martial និង Marcus Rashford សម្រាប់ការប្រកួតបើកឆាកនោះជំនួសវិញ ដោយឃើញពីទម្រង់លេងដ៏ល្អរបស់ពួកគេក្នុងការប្រកួតមុនបើករដូវកាលជាមួយបិសាចក្រហម។
ជម្រើសតែមួយសម្រាប់ Ronaldo ដើម្បីអាចចូលលេងប្រកួតបើកឆាកជាមួយ Brighton គឺថា Martial មិនទាន់ជាសះស្បើយពីរបួសសរសៃពួរដែលកើតឡើងពេលគេប្រកួតជាមួយ Atletico Madrid។
ប្រភព៖ Marca