បន្ទាប់ទើបយកឈ្នះទៅលើម្ចាស់ខ្សែក្រវាត់មកពីប្រទេសបេឡារុ Varats Dzmitry នៅទឹកដីកម្ពុជាកាលពីដើមខែកក្កដា ឥឡូវស្តេចប្រដាល់ថៃ Buakaw Banchamek (ប៊ូខាវ) ក៏បានប្រកាសកាលវិភាគឡើងសង្វៀនជាថ្មី នៅឯប្រកួតលក្ខណៈ Exhibition Kickboxing Match រៀបចំឡើងដោយក្រុមហ៊ុន RWS។
នេះជាការណាត់ជួបអ្នកវាយក្បាច់គុណចម្រុះ MMA របស់ប្រទេសជប៉ុន គឺកីឡាករវ័យក្មេង Kota Miura នៅឯសង្វៀន Rajadamnern Boxing Stadium ក្នុងទីក្រុងបាងកក ប្រទេសថៃ នាវេលាម៉ោង ០៧:០០ នាទីយប់ ថ្ងៃសុក្រ ទី ១៩ សីហា ឆ្នាំ ២០២២។ តម្លៃសំបុត្រចូលទស្សនា ថ្លៃចន្លោះពី ១ ០០០ ទៅ ៦ ០០០ បាត ឬប្រហែល ២៥ ទៅ ១៦៥ ដុល្លារ។ បញ្ជាក់ថា ច្បាប់នៃការប្រកួត Kickboxing គឺតម្រូវឲ្យប្រើកណ្តាប់ដៃ និងជើង តែមិនអនុញ្ញាតប្រើប្រាស់កែងនោះទេ។
អ្នកប្រដាល់មួយថៃ វ័យ ៤០ ឆ្នាំ បានខកខានការឡើងសង្វៀនមួយនោះ អស់រយៈពេល ១៨ ឆ្នាំមកហើយ រីឯការប៉ះគ្នាខាងមុខ ក៏បង្កើតការចាប់អារម្មណ៍ខ្លាំង ព្រោះគូបដិបក្ខមិនត្រឹមតែមានគុណភាពលើសង្វៀន ទៀតសោតរូបសម្រស់ក៏ឆក់យកអស់បេះដូងនារីជាច្រើនផងដែរ។
Kota Miura ឬត្រូវបានគេដាក់រហស្សនាមជា “Kings Junior” ទើបតែមានវ័យ ២០ ឆ្នាំប៉ុណ្ណោះ ហើយបានបង្ហាញខ្លួនជាលើកដំបូង នៅកម្មវិធី RIZIN.33 កាលពីចុងខែធ្នូ ឆ្នាំទៅ រួចបានបង្កើតលទ្ធផលយកឈ្នះទៅលើអ្នកវាយគុណចម្រុះ Yushi Sakura ត្រឹមទឹកទី ១។
យុវជនកើតនៅឆ្នាំ ២០០២ រូបនេះ មានកម្ពស់ ១,៧៥ និងទម្ងន់ខ្លួន ៦៥ គីឡូក្រាម។ មានរឿងគួរឲ្យចាប់អារម្មណ៍នៅពីក្រោយអត្តសញ្ញាណ អ្នកវាយគុណចម្រុះ MMA ខាងលើ ត្រង់ថា ឪពុកបង្កើតរបស់គេ ជាកីឡាករបាល់ទាត់ដែលមានវ័យចំណាស់បំផុតក្នុងលោក ហើយជឿថាប្រិយមិត្តភាគច្រើន ប្រាកដជាស្គាល់ នោះគឺកីឡាករជប៉ុន Kazuyoshi Miura។
ជាការដើរខុសគន្លងឪពុក ដោយកូនប្រុសពៅខាងលើ បានចាប់ផ្ដើមស្រលាញ់ចូលចិត្តទស្សនាការប្រកួតលើសង្វៀន តាំងពីនៅរៀនកម្រិតមធ្យមសិក្សា ហើយធំបន្តិច ក៏សុំឪពុកទៅចូលហ្វឹកហាត់នៅក្លឹបក្បាច់គុណមួយ មុនវិវត្តខ្លួនក្លាយជាអ្នកអាជីព MMA ទល់សព្វថ្ងៃ។ នៅពេលចុងក្រោយ កេរ្តិ៍ឈ្មោះ Kota បានសាយភាយក្នុងប្រទេសជប៉ុន ក៏ដូចជាទូទាំងប្រព័ន្ធផ្សព្វផ្សាយក្រៅតំបន់ ដែលគេចាប់អារម្មណ៍ខ្លាំងលើរូបរាងកាយដ៏សង្ហារ និងស្នាមញញឹមថ្ពក់យកបេះដូងនារីៗ បើទោះបីពួកគេខ្លះមិនជាអ្នកស្នេហាវិស័យកីឡាមួយនេះក៏ដោយ។
ចុងក្រោយនាំឲ្យស្គាល់ឪពុករបស់ Kota បន្តិច នោះគឺអតីតខ្សែប្រយុទ្ធជម្រើសជាតិជប៉ុន លោក Kazuyoshi ដែលជាមួយក្រុមសាំមូរ៉ៃខៀវ លោកបានចូលនិវត្តយូរហើយ តែការលេងឲ្យក្លឹប នៅបន្តទល់សព្វថ្ងៃជាមួយក្លឹប Suzuka Point Getters ស្ថិតក្នុងក្របខ័ណ្ឌកម្រិតទី ៤ របស់ជប៉ុន។ អ្វីដែលភ្ញាក់ផ្អើលខ្លាំង បុរសម្នាក់នេះ មានវ័យ ៥៥ ឆ្នាំទៅហើយ ពោលបានជាប់ឈ្មោះនៅកំណត់ត្រាកីឡាករបាល់ទាត់អាជីព មានវ័យចំណាស់ជាងគេក្នុងលោក៕
ប្រភព៖ បរទេស