ទន្ទឹមនឹងការមកដល់នៅរដូវកាលថ្មីខាងមុខ ក្លឹបមេឃខៀវ Manchester City ក៏បានប្រកាសចេញនូវក្រមាឆ្លាតវៃ ដែលជាផលិតផលទើបបញ្ចប់ការធ្វើតេស្តជោគជ័យ ជាកិច្ចសហការរវាងក្រុមហ៊ុន Cisco។
ក្រមានោះមានបំពាក់នូវឈីប និង Bisensor ឲ្យឈ្មោះ ‘EmotiBit’ ដោយវាមានលក្ខណៈពិសេស អាចស្ទាបស្ទង់ដឹងពីកម្តៅរាងកាយ ចង្វាក់បេះដូង និងការឆ្លើយតបនៃអារម្មណ៍អ្នកគាំទ្រ ពេលដែលប្រើប្រាស់វាមកលើដងខ្លួន កំឡុងពេលទស្សនាបាល់ទាត់ក្នុងកីឡដ្ឋាន។ ដំណើរការនេះ ក្លឹបធ្វើឡើងដើម្បីចង់ដឹងពីអារម្មណ៍អ្នកគាំទ្ររបស់ខ្លួន ថាឡើងចុះបែបម៉េច នៅរាល់ការឃើញសកម្មភាពនានាលើទីលាន។
មិនមានការបញ្ជាក់ច្បាស់ថា ក្រមាឆ្លាតវៃមួយនោះ នឹងដាក់លក់ក្នុងតម្លៃប៉ុន្មាន ឬជាការបន្ថែមក្នុងកញ្ចប់ណាមួយទេ តែមិនត្រឹមប្រើសម្រាប់ក្លឹបអង់គ្លេស City ប៉ុណ្ណោះទេ ទៀតសោតក៏នឹងផ្តល់ឲ្យអ្នកគាំទ្រនៃក្លឹបសម្ព័ន្ធ New York City នៅឯសហរដ្ឋអាមេរិកផងដែរ។
សេចក្ដីថ្លែងការណ៍របស់ក្លឹបបានចុះផ្សាយបែបនេះ៖ “អស់រយៈពេលជាង ១០០ ឆ្នាំ ក្រមាត្រូវបានប្រើប្រាស់ជាអត្តសញ្ញាណមួយរបស់អ្នកគាំទ្របាល់ទាត់ ហើយពីមួយសប្តាហ៍ទៅមួយសប្តាហ៍ វាជារបស់ដែលអាចដឹងនៅការឡើងចុះកម្តៅខ្ពស់ទាប សម្ពាធឈាម ញើស និងទឹកភ្នែករបស់អ្នកគាំទ្រទាំងឡាយ ឥឡូវនេះយើងរួមគ្នាជាមួយ Cisco យើងនឹងអភិវឌ្ឍនូវបច្ចេកវិទ្យាថ្មី ដែលអាចឲ្យក្រមាមួយនេះ យល់ច្បាស់ និងស្ទាបស្ទង់ដឹងនូវអារម្មណ៍ទាំងឡាយរបស់អ្នកគាំទ្រ នៅក្នុងការប្រកួតដ៏អស្ចារ្យ”៕
ប្រភព៖ Marca