ក្លឹបក្រហមស Atletico Madrid បានបន្ថែមការនាំយកអ្នកថ្មី ជាចំណូលថ្មីទី ៣ ប្រចាំទីផ្សារដោះដូររដូវក្តៅនេះ នោះគឺវត្តមានខ្សែការពារស្លាបស្តាំ Nahuel Molina ពីក្លឹប Udinese ប្រចាំលីគកំពូលអ៊ីតាលី។ កីឡាករបានព្រមព្រៀងការចុះហត្ថលេខា មានសុពលភាពដល់ចុងខែមិថុនា ឆ្នាំ ២០២៧ ហើយតម្លៃខ្លួនចន្លោះពី ១៥ ទៅ ២០ លានអឺរ៉ូ។
នេះជាការបោះជំហានថ្មី បន្ទាប់ការចាយពេល ២ រដូវកាលឲ្យក្លឹបអ៊ីតាលី ហើយក៏ជឿថា យុវជនវ័យ ២៣ ឆ្នាំ នឹងទទួលបានឱកាសអភិវឌ្ឍខ្លួនច្រើន ជាពិសេសមានសញ្ជាតិអាហ្សង់ទីនដូចជាអ្នកចាត់ការលោក Diego Simeone ស្រាប់ផង។ ស្ថិតិកាលនៅក្លឹបចាស់ ឈរជើង ៦៨ ប្រកួត ជាប់ជម្រើសដំបូង ៥១ លើក ក៏រកបាន ១០ គ្រាប់និង Assist ៧ លើកផងដែរ។
គួរបញ្ជាក់ថា មុននេះក្លឹប Atletico ក៏ទើបតែយកបាន Axel Witsel និង Samuel Lino ដែលក្លឹបបានចំណាយអស់តែ ៦,៥ លានអឺរ៉ូ ព្រោះការនាំយកបម្រើការពារ Witsel ពី Dortmund ក្នុងលក្ខខណ្ឌផ្ទេរឥតតម្លៃខ្លួន។ ចំណែកការចាកចេញរបូតកីឡាករដល់ទៅ ៣ រូប មាន Luis Suarez, Hector Herrera និង Sime Vrsaljko៕
ប្រភព៖ BeSoccer