បាល់ទាត់ជាកីឡាមួយប្រភេទ ដែលមានអ្នកគាំទ្រច្រើនបំផុតទូទាំងសកលលោក មិនថាតែក្មេងចាស់ប្រុសស្រី ឬសូម្បីលោកតាលោកយាយមួយចំនួន ក៏បន្តជាអ្នកគាំទ្របាល់ទាត់ ខ្លះដាំខ្ទឹមចាំស្រែកហ៊ោតែងតែពីនៅក្មេងវ័យ។
ដោយឡែកងាកមកចំណូលចិត្តតារាល្បីឈ្មោះទាំង ៥ រូបនេះវិញ តើពួកគាត់ជាអ្នកគាំទ្រក្លឹបបាល់ទាត់ណាខ្លះ?
៥) Daniel Craig តួអង្គ James Bond
តារាសម្ដែងក្នុងភាពយន្ត James Bond លោក Daniel Craig ក៏ជាអ្នកគាំទ្របាល់ទាត់មួយរូបដែរ ហើយក្លឹបដែលលោកស្រលាញ់ គឺហង្សក្រហម Liverpool។
ជាញឹកញយគេតែងប្រទះឃើញបុរសសញ្ជាតិអង់គ្លេសរូបនេះ មកចូលរួមទស្សនាដោយផ្ទាល់ នៅឯកីឡដ្ឋាន Anfield។ បុរសវ័យ ៥៤ ឆ្នាំធ្លាប់និយាយថា៖ “ពេលខ្ញុំដើរចូលកីឡដ្ឋាន Anfield វាធ្វើឲ្យខ្ញុំហាក់ដក់ជាប់អារម្មណ៍នៅទីនោះ ជារួមទៅ ទីលាននៃក្លឹបដទៃ គឺមិនដូច Anfield នោះឡើយ”។
៤) អតីតតារាសម្តែងរឿងក្តៅសាច់ Mia Khalifa
តារាស្រីវ័យ ២៩ ឆ្នាំ ក៏ជាអ្នកគាំទ្របាល់ទាត់មួយរូបដូចគ្នា ហើយក្លឹបដែលនាងស្រលាញ់ពេញចិត្តបំផុតនោះ គឺជាញញួរធំ West Ham United។ Khalifa ជានិច្ចកាលបានបង្ហោះរូបភាព ពាក់អាវពណ៌ឈាមជ្រូករបស់ក្លឹប West Ham នៅលើគណនី Instagram។
៣) តួអង្គ Spider-Man លោក Tom Holland
អ្នកនិយមទស្សនាខ្សែភាពយន្តបុរសពីងពាង ប្រាកដណាស់ ពិតជាបានស្គាល់ច្បាស់នៅឈ្មោះ Tom Holland ហើយបើផ្សារភ្ជាប់មកក្នុងវិស័យកីឡាបាល់ទាត់ បុរសសញ្ជាតិអង់គ្លេស គឺជាអ្នកគាំទ្រដ៏ងប់ងុលរបស់ក្លឹប Tottenham Hotspur។
កន្លងទៅ Holland ក៏ធ្លាប់បង្ហាញការស្រលាញ់អស់ពីបេះដូង នៅខាងក្រៅ តាមរយៈការថតរូបជាមួយ Son Heung-min។ នៅកិច្ចសម្ភាសន៍មួយកាលពីឆ្នាំ ២០២១ លោកនិយាយថា៖ “ខ្ញុំចង់ឃើញ Spurs និង Brentford ឡើងទៅដល់វគ្គផ្ដាច់ព្រ័ត្រ ពានរង្វាន់ Champions League ព្រោះលោកពូខ្ញុំ ជាអ្នកគាំទ្រក្លឹប Brentford ហើយខ្ញុំជាអ្នកគាំទ្រក្លឹប Spurs”។
២) តារាចម្រៀងស្រី Rihanna
តារាស្រីមានទ្រព្យខ្ទង់ពាន់លានដុល្លារ រមែងចាយលុយធ្វើដំណើរមកទស្សនាដោយផ្ទាល់ ដល់កីឡដ្ឋានក្នុងទីក្រុង Turin ដើម្បីតែគាំទ្រក្លឹបបាល់ទាត់ខ្លួនស្រលាញ់អស់ពីបេះដូង នោះគឺសេះបង្កង់ Juventus។
ប៉ុន្មានម្តងហើយ ធ្លាប់ឃើញតារាស្រីវ័យ ៣៤ ឆ្នាំខាងលើ បង្ហោះរូបភាពកាន់អាវឆ្នូតសខ្មៅ របស់ Juventus អមជាមួយនឹងឈ្មោះ “Riri”។ នេះកំពុងបង្ហាញយ៉ាងច្បាស់ថា បាល់ទាត់ពិតជាបានភ្ជាប់ទំនាក់ទំនងរវាងមនុស្សទូទាំងសកលលោក មិនថាអ្នកនោះជាតិសាសន៍អ្វី នៅប្រទេសណា មានមុខងារខ្ពស់ទាបបែបណា ក៏នៅតែមានចិត្តនិងគោលដៅតែមួយ គឺដើម្បីតែមកទស្សនាបាល់ទាត់។
១) អ្នកកីឡាកាស Rey Mysterio
បុរសលាក់មុខលើសង្វៀនកីឡាកាស ដែលជាប់រហស្សនាម “619” គឺជាអ្នកគាំទ្រកាន់ឆ្នាំរបស់ក្លឹប Manchester United។ នៅឆ្នាំ ២០១៨ Rey ធ្លាប់ទៅទស្សនាកីឡដ្ឋាន Old Trafford ដោយផ្ទាល់ ហើយបានលាន់មាត់ថា៖ “នេះក្តីស្រមៃរបស់ខ្ញុំបានក្លាយជាការពិតហើយ”។
រួចក្រោយៗមក Rey ក៏ធ្លាប់បានទៅជួបកីឡាករបិសាចក្រហមប៉ុន្មានលើកដែរ ពេលក្រុមទៅចូលរួមការប្រកួតត្រៀមបើករដូវកាល នៅឯទឹកដីសហរដ្ឋអាមេរិក។ ចុះអ្នកដែលកំពុងអាននេះវិញ តើជាអ្នកគាំទ្រក្លឹបណាមួយទៅ?
ប្រភព៖ បរទេស