ក្លឹប Ajax បានប្រកាសផ្លូវការ អំពីការនាំយកខ្សែប្រយុទ្ធថ្មី ហើយគេជឿថា នេះជាចេតនាក្លឹបនាំយកមកបំពេញកន្លែង Antony ដែលជឿជាក់ប្រាកដនឹងត្រូវរបូតទៅឲ្យក្លឹបដទៃនៅពេលដ៏ខ្លីខាងមុខ។ នោះគឺក្លឹបយកបានខ្សែប្រយុទ្ធស្លាប Francisco Conceicao ចេញពី FC Porto នៅតម្លៃផ្ទេរ ៥ លានអឺរ៉ូ។
កីឡាករលេងតំណែងស្លាបស្តាំ វ័យ ១៩ ឆ្នាំខាងលើ បានព្រមព្រៀងកុងត្រាថ្មីសន្លាងរយៈពេល ៥ ឆ្នាំនៅ Ajax ដែលនេះគេហ៊ានសន្មតថាជាគ្រាប់ពេជ្រពន្លកថ្មី ក្លឹបត្រៀមបណ្តុះឲ្យរីកចម្រើនដូច Antony ដែលត្រៀមផ្ទេរចេញទៅកាន់ក្លឹប Man Utd នៅតម្លៃខ្ពស់មហាសាល។ ធ្លាប់បង្ហាញខ្លួនឲ្យក្លឹបអាជីព ៣៣ ប្រកួត គេរកបាន ៣ គ្រាប់និង Assist ២ លើក។
ងាកទៅចចាមអារ៉ាម Antony ឯណោះវិញ គេអាចជាមានតម្លៃផ្ទេរចន្លោះ ៥០ លានផោន ហើយបើទៅចុះចូលនៅ Old Trafford នោះភាគរយជាប់ជម្រើសដំបូង ក៏មានខ្ពស់ ព្រោះមានអ្នកចាត់ការលោក Erik ten Hag នៅឈរជើងស្រាប់។ រំឭកថា កីឡាករសញ្ជាតិប្រេស៊ីលស្ថិតិកាលនៅក្លឹបហូឡង់រដូវកាលមុន ធ្វើបានល្អគួរសម ដោយបង្ហាញខ្លួន ៣២ ប្រកួត រកបាន ១២ គ្រាប់និង Assist ១០ លើក៕
ប្រភព៖ BeSoccer