ការផ្ទេរ Paulo Dybala ទៅកាន់ក្លឹប AS Roma សារនេះ ហាក់នាំឲ្យផ្ទុះការចាប់អារម្មណ៍ជាខ្លាំង ជាពិសេសអ្នកគាំទ្រក្លឹបអ៊ីតាលីផ្ទាល់ក៏មានការសាទរជាពន់ពេក ហើយសម្រុកទៅទិញអាវកីឡាករអាហ្សង់ទីន ដែលទើបបើកលក់ថ្មីថ្មោង។
តួលេខលក់ចេញអាវ Dybala ភ្ជាប់លេខ ២១ ខាងក្រោយ លក់ចេញដល់ទៅ ៥៣០ ០០០ អាវនៅរយៈពេល ២៤ ម៉ោងដំបូង នេះនាំមុខកំណត់ត្រាចាស់របស់ Cristiano Ronaldo ដែលលក់បានតែ ៥០០ ០០០ អាវប៉ុណ្ណោះ គ្រាផ្លាស់ទៅក្លឹប Juventus ថ្មីថ្មោង កាលពីឆ្នាំ ២០១៨។ នេះបើតាមសារព័ត៌មាន Corriere dello Sport បានចុះផ្សាយ។
រំឭកឲ្យដឹងថា Dybala តាមពិតទៅ អាចទទួលបានអាវលេខ ១០ ជាលេខពិសេសក្លឹបផ្តល់ឲ្យ ដ្បិតបើអតីតកាលជាលេខអាវរបស់វីរបុរស Totti។ យ៉ាងណាកីឡាករបានបដិសេធមិនទទួលយក ហើយសម្រេចជ្រើសយកអាវលេខ ២១ ដោយគិតថា ចាំពេលបន្ទាប់ សឹមផ្លាស់មកយកលេខអាវ ១០ ក៏មិនហួសពេល។ ស្ថិតិកាលនៅក្លឹបចាស់សេះបង្កង់ បង្ហាញខ្លួនសរុបច្រើនជាង ៣០០ ប្រកួត រកបាន ១២២ គ្រាប់និង Assist ៤៩ លើក៕
ប្រភព៖ Corriere dello Sport