Cristiano Ronaldo បានត្រលប់មកកាន់ទីក្រុង Manchester វិញហើយ តែបើទោះបីមានចេតនាចង់មកចរចាយកលទ្ធផលសម្រេច អំពីគោលបំណងចង់ចាកចេញ ក៏ក្លឹបនៅតែតម្រូវឲ្យកីឡាករព័រទុយហ្គាល់ត្រូវអនុវត្តទៅតាមគោលការណ៍ជាកីឡាករអាជីពជាប់កុងត្រាជាចាំបាច់ ពោលទាំងការហ្វឹកហាត់ ក៏ដូចជាការចូលរួមប្រកួតមួយចំនួននាពេលខាងមុខ។
បើតាមសារព័ត៌មាន AS ចុះផ្សាយថា ដំណើរការចរចាក្លឹបថ្មីបែបណា ត្រូវទុកមួយឡែក ដ្បិតបើកាលបរិច្ឆេទបិទទីផ្សារ ត្រូវផុតនៅថ្ងៃទី ១ កញ្ញា។ សំខាន់ត្រូវដោះស្រាយបញ្ហាចំពោះមុខសិន ពោលត្រូវតែត្រលប់មកហ្វឹកហាត់ដូចដើម ឲ្យគ្រប់លក្ខណៈជាកីឡាករអាជីព ១០០ ភាគរយ ហើយប្រកួតកម្តៅសាច់ដុំ ឬមិត្តភាពនៅពេលខាងមុខ បើគ្រូកោះហៅគឺត្រូវតែចូលលេង។
រំឭកថា ប្រកួតបន្ទាប់ពីរនៅចុងសប្តាហ៍ គឺ United ត្រូវលេងទល់ក្លឹប Atletico Madrid និង Rayo Vallecano នាថ្ងៃសៅរ៍-អាទិត្យជាប់គ្នា ដូច្នេះកីឡាករវ័យ ៣៧ ឆ្នាំ អាចនឹងបង្ហាញខ្លួននៅប្រកួតមួយក្នុងចំណោមនោះក៏ថាបាន។ ស្របពេលស្ថានភាពដោះដូរ នៅព្រឹកមិញនេះ ខាងក្លឹប Atletico Madrid មួយផ្សេងទៀត បានប្រកាសដកខ្លួន ថាមិនបានជាប់ពាក់ព័ន្ធនឹងដំណើរការចរចាអ្វីទាំងអស់រវាង CR7 ដូច្នេះជម្រើសក្លឹបចុងក្រោយ ២ ដែលសេសសល់មានតែ Sporting CP និង Chelsea តែប៉ុណ្ណោះឯង៕
ប្រភព៖ AS