Chelsea ជាក្លឹបដែលទទួលបានការចាប់អារម្មណ៍ច្រើន នៅពេលចុងក្រោយ ជាពិសេសក្រោយការឈ្នះពានរង្វាន់ UEFA Champions League នៅរដូវកាល ២០១៩/២០។ ទោះជាយ៉ាងណាស្ថានភាពចុងក្រោយមិនសូវជាល្អ បន្ទាប់ពីមានរឿងរ៉ាវការបង្ខំចិត្តចុះចេញរបស់ម្ចាស់ក្លឹប សញ្ជាតិរុស្ស៊ី លោក Roman Abramovich និងជំនួសដោយមេថ្មី ជាសេដ្ឋីអាមេរិក លោក Todd Boehly។
ដោយឡែកងាកមករឿងរ៉ាវអត្ថបទនេះ យើងបង្ហាញកីឡាកររបស់ Bayern Munich ដែលជាអ្នកគាំទ្រក្លឹបម្ចាស់ដី Stamford Bridge តាំងតែពីនៅតូច ហើយសារភាពចំៗកន្លងទៅ បើទោះបីពេលនេះ កំពុងឈរជើងឲ្យក្លឹបអាល្លឺម៉ង់ក្តី។ នោះគឺ ខ្សែការពារស្លាប Alphonso Davies។
បុរសវ័យ ២១ ឆ្នាំ សញ្ជាតិកាណាដា បានឆ្លើយនឹងសំណួរ សួរថាតើក្លឹបនៅអង់គ្លេសណាមួយ ដែលលោកស្រលាញ់គាំទ្របំផុត? ស្រាប់តែ Davies ឆ្លើយ៖ “ខ្ញុំធំធាត់ឡើង តែងតែមើលការប្រកួតរបស់ Chelsea ដូច្នេះចម្លើយគឺប្រាកដជា ក្លឹប Chelsea ហើយ”។
រំឭកថា Davies នៅតែបន្តជាចំណែកសកម្ម ក្រោមការដឹកនាំរបស់លោក Julian Nagelsmann ហើយបើសរុបការបង្ហាញខ្លួន ១១៥ ប្រកួតឲ្យ Bayern គេរកបាន ៥ គ្រាប់និង Assist ១៨ លើក។ សុពលភាពកុងត្រា កីឡាករខាងលើ សេសសល់ដល់ចុងខែមិថុនា ឆ្នាំ ២០២៥ ដូចនេះយើងនឹងរង់ចាំមើល តើពេលវេលាទៅមុខ គេអាចនឹងផ្សារភ្ជាប់ទៅកាន់ក្លឹបនៅឯអង់គ្លេសឬអត់ ព្រោះចុងក្រោយក៏ល្ហិចល្ហៀងក្រុមលោក Thomas Tuchel ត្រៀមនឹងវ៉ៃចេញ Marcos Alonso ជាខ្សែការពារស្លាបឆ្វេងផងដែរ៕
ប្រភព៖ Sportskeeda