ក្លឹប Barcelona ហាក់ព្យាយាមបង្ខំចង់ឲ្យ Frenkie de Jong ចាកចេញទៅ ព្រោះដើម្បីលក់យកលុយមួយចំនួនបង្វិលចូលក្លឹប តែយ៉ាងណាកីឡាករមិនបានគិតធូរ និងយល់ស្របលឿនៗតាមសំណើក្លឹបចង់បាននោះទេ។ ដូចជាការផ្ទេរទៅ Man Utd បើខ្សែបម្រើហូឡង់ឆ្លើយ “Yes” ម្ល៉េះការចរចានឹងសម្រេចតាំងពីយូរ តែនេះមកពីក្លឹបមេព្រម តែកូនចៅជាកីឡាករបដិសេធ។
យ៉ាងណាបើតាមសារព័ត៌មាន SPORT ចុះផ្សាយថា ឥឡូវ De Jong បើកចិត្តព្រមដើរចេញពីក្លឹបអេស្ប៉ាញហើយ តែលុះត្រាណាបានទៅចុះចូលនៅក្លឹបតោខៀវ Chelsea។ នេះជាក្លឹបតែមួយគត់ ដែលគេព្រមចាកចេញទៅ ប្រសិនជាក្លឹបពិតជាប្រញាប់ចង់បានលុយពិតមែន តែបើឲ្យផ្លាស់ទៅ United គឺសុំបន្តឆ្លើយ “No” ដូចមុន។
រំឭកឲ្យដឹងថា ក្លឹប Barcelona បើទោះបីត្រូវលក់ចេញ De Jong នៅតម្លៃខ្ពស់ជាង ៥០ លានអឺរ៉ូ តែងាកទៅមើលថ្លៃពលកម្ម តាមចចាមអារ៉ាមកន្លងមក នៅជាប់ជំពាក់កីឡាករ ២០ លានអឺរ៉ូ មិនទាន់សងដាច់ផង។ កីឡាករវ័យ ២៥ ឆ្នាំ នៅជាប់កុងត្រាដល់ចុងខែមិថុនា ឆ្នាំ ២០២៦ ហើយស្ថិតិរដូវកាលចាស់ បង្ហាញខ្លួន ៤៥ ប្រកួត រកបាន ៤ គ្រាប់និង Assist ៥ លើក៕
ប្រភព៖ SPORT