នៅតំណែងជាខ្សែប្រយុទ្ធ សម្រាប់ Cristiano Ronaldo ផ្ដោតសំខាន់បំផុត ទៅលើការរកគ្រាប់បាល់ ហើយការបញ្ចប់ទីរបស់លោក ជារឿយៗកើតចេញពីថ្វីជើងទាំងសងខាង តែក៏មានពេលខ្លះធ្វើបានដោយការប្រើក្បាលតែតបញ្ចូលទី។
គុណភាពការលោតតែតបញ្ចប់ទី ក៏អរគុណទៅដល់កម្ពស់អំណោយទានពីធម្មជាតិ ១,៨៧ ម៉ែត្រ ដែល Ronaldo ទទួលបាន និងបច្ចេកទេសខិតខំហ្វឹកហាត់ទាំងយប់ថ្ងៃ ដល់រកបានគ្រាប់បាល់តាមរយៈការតែតច្រើនជាង ១០០ គ្រាប់ក្នុងអាជីព។ ខាងក្រោម CTS SPORT ធ្វើការបង្ហាញកំណត់ត្រាលោតតែតបញ្ចប់ទី ខ្ពស់បំផុតដែល CR7 ធ្លាប់ធ្វើបានទាំង ៤ លើក៖
៤) ទល់ជម្រើសជាតិវែល
នៅឆ្នាំមាស ២០១៦ ដែលព័រទុយហ្គាល់ ក្លាយជាម្ចាស់ជើងឯកពាន Euro មុននោះ នៅវគ្គ ៤ ក្រុមចុងក្រោយ Cristiano Ronaldo ក៏ជាចំណែករកបានគ្រាប់បាល់ ជួយក្រុមយកឈ្នះទៅលើនាគក្រហមវែល ២-០។
គ្រាប់បាល់នៅនាទី ៥០ ពេលនោះ ម្ចាស់អាវលេខ ៧ លោតនៅកម្ពស់ ២,៤២ ម៉ែត្រ នេះបើយើងវាស់ប្រវែងពីដី មកដល់ចុងក្បាល ផុតអស់បណ្តុំខ្សែការពារក្រុមវែល ដែលព្យាយាមប្រជែងយកបាល់។
៣) ទល់ក្លឹប Torino
គ្រាឈរជើងឲ្យក្លឹបសេះបង្កង់ Juventus តារាឆ្នើមសញ្ជាតិព័រទុយហ្គាល់ ក៏រមែងបង្កើតភាពអស្ចារ្យជាច្រើនលើកច្រើនសារផងដែរ តាមរយៈការលោតតែតបញ្ចប់ទី នៅកម្ពស់ខ្ពស់ៗផុតអស់ខ្សែការពារមាឌឌាំងជាច្រើន។
ដូចប្រកួតទល់ Torino ដែលក្លឹបប៊ិះតែនឹងចាញ់ក្រោមលទ្ធផល ១-០ តែចុងក្រោយបែរ Ronaldo អាចបង្កើតគ្រាប់បាល់តាមស្មើនៅនាទី ៨៤ ជាមួយការលោតតែត បាល់ក្នុងប្រអប់ ក្រុសចេញពីជើង Spinazzola នៅកម្ពស់ ២,៤៧ ម៉ែត្រ។
២) ទល់ក្លឹប Sampdoria
នៅឆ្នាំ ២០១៩ ដដែល តែទល់ក្លឹប Sampdoria ក៏ CR7 បានសម្ញែងសាច់ដុំជាថ្មី បន្ទាប់ការក្រុសចូលពីជ្រុងខាងឆ្វេង ដោយ Alex Sandro ហើយ Ronaldo ក៏លោតផុតកម្ពស់ពីដី ៧១ សង់ទីម៉ែត្រ តែបើរាប់ដល់ចុងសក់ គឺ ២,៥៦ ម៉ែត្រ តែតបញ្ចប់ទីយ៉ាងស្អាត។
១) ទល់ក្លឹប Manchester United
ត្រលប់ទៅឆ្នាំ ២០១៣ គ្រា Ronaldo លេងប៉ះអតីតក្លឹបចាស់ Man Utd នៅឯពានរង្វាន់ UCL ពេលនោះហើយ ជាពេលលោកចារកំណត់ត្រាប្រវត្តិសាស្ត្រ លោតបានខ្ពស់បំផុត។
Angel di Maria ជាអ្នកក្រុសបាល់ចូលប្រអប់ ហើយ Ronaldo លោតផុតខ្សែការពារ Evra និង Evans អាចបញ្ចប់ទីរកបានគ្រាប់បាល់តាមស្មើ ១-១ ឲ្យ Real Madrid។ តាមកំណត់ត្រាដែលគេកត់ទុកពេលនោះ កម្ពស់ពីដី ដល់ចុងសក់ Ronaldo គឺ ២,៩៥ ម៉ែត្រ៕
ទស្សនាវីដេអូខាងក្រោម៖
https://youtu.be/Zh17peVya-Y
ប្រភព៖ បរទេស | ប្រែសម្រួល៖ ក្នុងស្រុក