ក្លឹបបារាំង Paris Saint-Germain បានណាត់ការប្រកួតទល់ក្លឹប ៣ នៅឯប្រទេសជប៉ុន ដោយម្សិលមិញនេះ ទើបតែបញ្ចប់ការយកឈ្នះ ២-១ ទៅលើ Kawasaki Frontale ក៏ជាក្លឹបធំមួយនៅ J-League។ វាជាទស្សនីយភាពការជួបគ្នាលើកទី ២ នៃការតតាំងគ្នារវាង Lionel Messi សញ្ជាតិអាហ្សង់ទីន និងកីឡាករមាឌល្អិត ចិត្តដំរី Chanathip Songkrasin ដែលគេដាក់រហស្សនាមជា “Messi ថៃ”។
Chanathip ឈរជើងលើទីលាន ៥៦ នាទី នៅតំណែងជាខ្សែបម្រើស្លាបឆ្វេង ដែលនាំឲ្យរមែងមានការប្រទះគ្នាច្រើនក្នុងការប្រកួត ជាមួយ Messi ដែលលេងប្រយុទ្ធស្លាបស្តាំ ឈរជើងដល់នាទី ៦២ និងរកបានមួយគ្រាប់។ គេចាប់អារម្មណ៍ខ្លាំងនៅនាទី ៣១ ដែលតារាឆ្នើមអាហ្សង់ទីនប៊ិះតែនឹងរកបានមួយគ្រាប់យ៉ាងងាយ តែបែរជាត្រូវកីឡាករថៃ រារាំងនៅចំណុចខ្សែបន្ទាត់ទី។
ចង្វាក់ពេលនោះ Mbappe បានឆ្កឹះបាល់ក្នុងប្រអប់ ទៅឲ្យ Messi ដែលអូសបាល់ផុតអ្នកចាំទី រួចក៏ស៊ុតមួយជើង តែបែរត្រូវ Chanathip ឈរនៅលើខ្សែបន្ទាត់ រារាំងបាល់បានសម្រេច។ រំលងតែ ២០ វិនាទីបន្ទាប់ Mbappe ក៏មានឱកាសកាត់បាល់ក្នុងប្រអប់ជាថ្មី តែសារនេះ ត្រូវបាន Achraf Hakimi ជាអ្នកទម្លាក់បន្តឲ្យ ដល់ជើង Messi ស៊ុតមួយឆ្ងាញ់ បើកការនាំមុខឲ្យក្លឹប។
ទោះជាយ៉ាងណា ចង្វាក់លេងរបស់ PSG យប់មិញ យើងឃើញថា នៅតែបានដាក់សម្ពាធមួយទំហឹងទៅលើក្លឹបរបស់ប្រទេសជប៉ុន ដោយគ្រប់គ្រងបាល់ ៦៣ ភាគរយ ស៊ុត ២៤ លើក ចំគោលដៅ ១០ លើក ប៊ិះតែរកបានលើស ៤ គ្រាប់ឯណោះ ធៀបនឹងក្លឹបម្ចាស់ផ្ទះ គ្រប់គ្រងបាល់ ៣៧ ភាគរយ ស៊ុត ១៤ លើក ចំគោលដៅ ៥ លើក។
បន្ទាប់ចប់ការប្រកួត Chanathip ក៏បាននិយាយបែបនេះថា៖ “មានប៉ុន្មានលើកដែរ ខ្ញុំបានព្យាយាមរត់ទៅឆក់យកបាល់ពី Messi តែខ្ញុំធ្វើអត់បានទាល់តែសោះ នេះវាបានធ្វើឲ្យខ្ញុំភ្ញាក់ស្មារតី ហើយគិតឃើញថា កម្រិតរវាងពួកយើង និងកម្រិតកីឡាករលំដាប់ពិភពលោកគឺខុសគ្នាឆ្ងាយ តែយ៉ាងណា វាបានជំរុញឲ្យខ្ញុំនឹងខិតខំកាន់តែខ្លាំងឡើង ហើយដាក់ឆន្ទៈកាន់តែខ្ពស់បន្ថែមទៀត”។ នេះបើតាមសារព័ត៌មាន ESPN Asia បានចុះផ្សាយ។
គួរបញ្ជាក់ថា កីឡាករវ័យ ២៨ ឆ្នាំខាងលើ បានផ្ទេរចេញពីក្លឹបជប៉ុន Sapporo មកកាន់ Kawasaki នៅតម្លៃខ្លួន ៣,៥ លានអឺរ៉ូ ហើយស្ថិតិរដូវកាលចាស់ បង្ហាញខ្លួន ១៥ ប្រកួត រកបាន ២ គ្រាប់និង Assist ២ លើក។ ជំនួបបន្ទាប់របស់ Kawasaki Frontale នឹងត្រូវតតាំង Urawa Reds នៅ J1 League ថ្ងៃទី ៣០ កក្កដា មុនការប៉ះគ្នាទល់ក្លឹប Cerezo Osaka នាវគ្គ ៨ ក្រុមចុងក្រោយ ពាន J.League Cup នៅថ្ងៃទី ៣ សីហា។
ចំណែកឯក្លឹបអ្នកមានក្នុងទីក្រុងប៉ារីស នៅបន្តយុទ្ធនាការប្រកួតមិត្តភាពឆ្នាំ ២០២២ នាថ្ងៃទី ២៣ កក្កដា ទល់ក្លឹប Urawa Reds និង ២៥ កក្កដា ទល់ក្លឹប Gamba Osaka វេលាម៉ោង ០៥:០០ នាទីល្ងាចដូចគ្នា ហើយសុទ្ធសឹងមានផ្សាយបន្តផ្ទាល់ លើទំព័រ CTS SPORT៕
ប្រភព៖ បរទេស