នៅរយៈពេលជាងកន្លះឆ្នាំមកនេះ បើរាប់ទាំងលើទីផ្សារដោះដូររដូវរងា និងចូលមកដល់ទីផ្សាររដូវក្តៅ ដែលកំពុងបើកទ្វារ ក្លឹប Barcelona បានចំណាយអស់ជិត ២០០ លានអឺរ៉ូហើយ ខណៈដែលចំណូលចូលមកវិញ ពីការលក់ចេញកីឡាករ ប្រមូលមិនបាន ១០០ លានអឺរ៉ូផង។ ទន្ទឹមចចាមអារ៉ាមជុំវិញការចង់នាំចូលអ្នកថ្មីបន្ថែម ដូចជាគោលដៅទៅលើកីឡាករ Cesar Azpilicueta និង Jules Kounde ក៏នាំឲ្យកើតមានចម្ងល់ពីអ្នកគាំទ្រ ចោទសួរមកកាន់ CTS SPORT ថាតើអ្នកមានបុណ្យ កំពុងប្រើប្រាស់វិធីចាយលុយដោយរបៀបណា ឬក៏ពួកគេដើរប៉ះកំណប់ ទាំងដែលក្លឹបនៅជាប់ជំពាក់បំណុលចាស់ ជាមួយធនាគារអាមេរិក Goldman Sachs ដល់ទៅជិត ១ ពាន់លានអឺរ៉ូ?
ចម្លើយយ៉ាងខ្លី មុនឈានដល់ការបកស្រាយស៊ីជម្រៅ នោះគឺ បំណុលនៅតែបន្តជាបំណុល តែ Barcelona កំពុងដើរយុទ្ធសាស្ត្រមួយចានទឹកមួយចានគោកហៅថា “បញ្ចាំអនាគត ដោះទុក្ខបច្ចុប្បន្ន” ក្រោមការគ្រប់គ្រងរបស់ប្រធានលោក Joan Laporta និងការអនុម័តពីក្រុមប្រឹក្សាភិបាលជាសមាជិក។
ជាការពិត Barcelona នៅពេលចុងក្រោយ បានចាយលុយក្រាស់ក្រែលទៅលើការនាំចូលកីឡាករធំៗដូចជា Ferran Torres ចាយអស់ ៥៥ លាន, Raphinha ចាយអស់ ៥៨ លាន និង Robert Lewandowski អស់ ៤៥ លានអឺរ៉ូ ខណៈលក់ចេញទៅវិញ Emerson Royal, Junior Firpo និង Philippe Coutinho បានតែ ៦០ លានអឺរ៉ូប៉ុណ្ណោះ។ ចំណែកឯលុយខ្ទង់រយលាន ដែល Barca កំពុងចាយ គឺទទួលបានពីលុយនៃកិច្ចព្រមព្រៀងមួយផ្នែក ជាមួយនឹងក្រុមហ៊ុនម្ចាស់ឧបត្ថម្ភថ្មី គឺ Spotify ហើយមួយផ្នែកធំផ្សេងទៀត ជាលុយទទួលបានពីការលក់ភាគហ៊ុន ឬទ្រព្យសម្បត្តិនានាដែលក្លឹបនៅសេសសល់ក្នុងដៃ ដើម្បីប្តូរជាលុយមកប្រើប្រាស់នៅពេលបច្ចុប្បន្ន។
ជាក់ស្ដែងតាមសេចក្តីប្រកាសកាលពីថ្ងៃទី ៣០ មិថុនាកន្លងទៅនេះ ក្រុមប្រឹក្សាភិបាលបានអនុម័តឲ្យប្រធានលោក Laporta លក់សិទ្ធផ្សាយលើប៉ុស្តិ៍ទូរទស្សន៍ La Liga ចំនួន ១០ ភាគរយ ទៅឲ្យក្រុមហ៊ុនអាមេរិក Sixth Street Partners លើកុងត្រារយៈពេល ២៥ ឆ្នាំ ស្មើនឹងទឹកប្រាក់ ២០៧,៥ លានអឺរ៉ូ។ ១ ភាគ ៣ នៃលុយដែលទទួលបាន Barca បានចាយវាយលើការនាំចូលកីឡាករ តួយ៉ាងដូចជាវត្តមាន Raphinha ហើយក៏បម្រុងនឹងចង់លក់ ១៥ ភាគរយផ្សេងទៀត ដើម្បីប្រមូលលុយ ៣០០ លានអឺរ៉ូមកចូលហោប៉ៅក្លឹប។ នេះបើតាមសារព័ត៌មាន Reuters បានចុះផ្សាយ។
បន្ថែមពីនេះ ក្លឹបក៏រំពឹងទទួលបានប្រាក់ ២០០ ទៅ ៣០០ លានអឺរ៉ូផ្សេងទៀត ពីការលក់ភាគហ៊ុន ៤៩,៩ ភាគរយនៃអាជ្ញាប័ណ្ណផ្តាច់មុខ សម្រាប់ domain store.fcbarcelona.com ដែលជាប្រតិបត្តិការលក់ផលិតផលផ្លូវការរបស់ក្លឹប ជាហេតុនាំឲ្យចំណូលនៅរដូវក្តៅទាំងមូល អាចឡើងដល់ជាង ៦០០ លានអឺរ៉ូ ល្មមអនុញ្ញាតឲ្យពួកគេអាចចាយវាយលើការនាំចូលកីឡាករ មកបំពេញចិត្តអ្នកចាត់ការលោក Xavi Hernnadez។
ក៏ប៉ុន្តែប្រាក់ទាំងអស់នេះ ក្លឹបតម្រូវឲ្យផ្ទេរចេញមួយផ្នែក ទៅកាត់កងបំណុលចាស់ សងក្រុមហ៊ុនកម្ចី Goldman Sachs ដោយបង់ដំណាក់កាលដំបូងប្រហែលជាង ៥០០ លាន។ រួចលុយសេសសល់ប៉ុន្មាន ក៏បង្វិលមកប៉ះប៉ូវលើការចរចាកុងត្រាថ្មី ដូចផ្តល់ឲ្យ Sergi Roberto និង Ousmane Dembele តែតម្រូវឲ្យព្រមបញ្ចុះថ្លៃឈ្នួល និងការទូទាត់លើប្រាក់ផ្ទេរចូល Raphinha ក៏ដូចជា Lewandowski ជាដើម។
តែក្នុងករណីក្លឹបចង់បានអ្នកថ្មីបន្ថែម ទោះមានលុយ ក៏ប្រឈមនឹងល្មើសច្បាប់ចំណាយ FFP អ៊ីចឹងត្រូវតែលក់ចេញកីឡាករមួយចំនួនសិន។ បើសួរថា តើការដើរយុទ្ធសាស្រ្តបែបនេះ មានផលប៉ះពាល់អ្វីឬអត់ទៅថ្ងៃអនាគត? ចម្លើយយ៉ាងខ្លី បើក្លឹបជោគជ័យអាចឈ្នះពានរង្វាន់ La Liga និង UCL នោះគ្រប់យ៉ាងនឹងអាចវិលមកភាពល្អប្រសើរវិញនៅពេលបន្ទាប់ តែបើទម្រង់លេងក្លឹបនៅបន្តធ្លាក់ចុះ នោះស្ថានភាពនឹងកាន់តែយ៉ាប់យ៉ឺនជាងមុន។
ក៏ដោយសារតែចាប់ពីរដូវកាលនេះតទៅ ចំណូលដែលក្លឹបទទួលបាន ពីការផ្សាយលើប៉ុស្តិ៍ទូរទស្សន៍ ការលក់ផលិតផលនានា មួយផ្នែកធំ បានធ្លាក់ដល់ដៃម្ចាស់ថ្មី ក្រោយការលក់ភាគហ៊ុន អ៊ីចឹងទល់តែពឹងលើចំណូលពីប្រាក់រង្វាន់នៃការឈ្នះពាន ទើបក្លឹបអាចបង្វិលលុយលើការចំណាយផ្សេងៗនាពេលបន្ទាប់បាន។ មិនដូច្នោះទេ ស្ថានភាពនាពេលទៅមុខ នឹងធ្លាក់ដល់បាត ដែលគ្មាននរណាអាចព្យាករណ៍ទុកជាមុន។
យ៉ាងណាវិធីម្យ៉ាងទៀត បើ Barcelona មិនសម្រេចចិត្តដើរផ្លូវកាត់នេះ នោះគឺក្លឹបត្រូវសម្របទៅតាមទ្រព្យដែលមាន ពោលរកបាន ៥ ចាយ ៥ រកបាន ១០ ចាយ ១០ ជារួមលទ្ធភាពនៃការពង្រឹងប្រព័ន្ធកីឡាករ គឺយឺតជាងនេះឆ្ងាយ។ ចុងក្រោយក៏សរសើរដល់គ្រប់កីឡាករ ដែលជ្រើសការផ្ទេរមកក្លឹបនៅតំបន់កាតាឡូញ៉ា សុទ្ធសឹងព្រមទទួលយកការផ្តល់ឲ្យថ្លៃពលកម្ម ទាបជាងសំណើក្លឹបដទៃ ត្រង់ចំណុចនេះ ក៏ជាដើមចមមួយ ជួយឲ្យអ្នកមានបុណ្យបន្តឈរជើងបានទល់សព្វថ្ងៃផងដែរ៕
ប្រភព៖ បរទេស