មានការមមាញឹកខ្លាំងលើទីផ្សារដោះដូរនៅប៉ុន្មានថ្ងៃចុងក្រោយ បន្ទាប់ពីក្លឹបធំៗនៅអឺរ៉ុប បានប្រកាសវត្តមានកីឡាករចំណូលថ្មី ពោលក្លឹបខ្លះ ទៅប្រកាសនៅក្រៅតំបន់ ដូចជា Chelsea និង Barcelona ជាដើម ដែលកំពុងជាប់យុទ្ធនាការប្រកួតនៅឯទឹកដីសហរដ្ឋអាមេរិក។ ក្នុងអត្ថបទនេះ CTS SPORT លើករឿងរ៉ាវកីឡាករ ៣ រូបមកនិយាយ ក៏ដូចជាបង្ហើបនូវថ្លៃពលកម្មដែលពួកគេទទួលបាននៅក្លឹបថ្មី៖
១) Raheem Sterling ផ្លាស់ទៅ Chelsea
បន្ទាប់ពីរួមរស់នៅ City អស់រយៈពេល ៧ ឆ្នាំ ទីបំផុតកីឡាករអង់គ្លេស ក៏ជ្រើសយកការផ្លាស់មកទ្រនំថ្មី នៅឯទឹកដី Stamford Bridge។ មកសារនេះ Sterling ទម្លាក់ចុងប៊ិចចុះហត្ថលេខាលើកុងត្រារយៈពេល ៥ ឆ្នាំ ហើយក៏បានឈរឈ្មោះ ជាកីឡាករទទួលបានប្រាក់ឈ្នួលខ្ពស់បំផុតប្រចាំក្លឹបផងដែរ។
តាមរបាយការណ៍ពី Miguel Delaney បានឲ្យដឹងថា Sterling ទទួលបានប្រាក់ពលកម្មដល់ទៅ ៣១០ ០០០ ផោន/សប្ដាហ៍ នេះជាតួលេខខ្ពស់ជាង ប្រាក់ឈ្នួលចាស់ កាលនៅទឹកដី Etihad រកបានត្រឹមចន្លោះ ២០០ ០០០ ទៅ ២៥០ ០០០ ផោន។
ទំហំនេះដែរ Sterling ទទួលបានខ្ពស់ជាង N’Golo Kante រកបាន ២៩០ ០០០ ផោន និង Timo Werner បាន ២៧២ ០០០ ផោន។ តែយ៉ាងណាយើងមិនបានរាប់បញ្ចូលឈ្មោះ Romelu Lukaku ជាកីឡាករខ្ចីជើងទៅក្លឹបដទៃឡើយ ដ្បិតអីខ្សែប្រយុទ្ធបែលហ្សិកអាចរកបានដល់ ៣៥០ ០០០ ផោន។
២) Christian Eriksen ផ្លាស់ទៅ Man Utd
ជាការស្វាគមន៍អ្នកចាត់ការថ្មី United បានប្រកាសការយកបានកីឡាករ ៣ រូបហើយ រួមមាន Tyrell Malacia, Christian Eriksen និង Lisandro Martinez។ យ៉ាងណាចំពោះកីឡាករវ័យចំណាស់ សញ្ជាតិដាណឺម៉ាក ក៏ទទួលបានការផ្តល់ឲ្យយ៉ាងសមរម្យ មិនថាតែពេលវេលាលើកិច្ចព្រមព្រៀង និងទំហំប្រាក់ពលកម្ម។
ខ្សែបម្រើវ័យ ៣០ ឆ្នាំ ជាមួយការចុះហត្ថលេខាលើកុងត្រា ដល់ចុងខែមិថុនា ឆ្នាំ ២០២៥ គេអាចរកបានដល់ទៅ ១៥០ ០០០ ផោន/សប្តាហ៍។ ទំហំនេះ រុញឲ្យ Eriksen ឈរលេខ ៩ ជាកីឡាករស៊ីថ្លៃបំផុតនៅ Old Trafford ស្មើនឹងកម្រិត Luke Shaw ហើយខ្ពស់ជាង Van de Beek, Telles និង Wan-Bissaka ជាដើម។
៣) Robert Lewandowski
បើទោះបីអាចចរចាដំឡើងថ្លៃពលកម្មខ្ពស់ជាងមុន នៅ Bayern Munich ក៏កីឡាករប៉ូឡូញនៅតែមិនយល់ព្រម ហើយជ្រើសការផ្ទេរមកក្លឹបថ្មី Barcelona ជាមួយការបញ្ចុះថ្លៃពលកម្មទាបជាងមុនដល់ ២៥ ភាគរយ។
ខ្សែប្រយុទ្ធខាងលើ រកបានតែ ១៥០ ០០០ ផោនប៉ុណ្ណោះក្នុងមួយសប្តាហ៍ ដែលទំហំនេះទាបជាងកាលនៅ Bayern Munich រកបាន ២០០ ០០០ ផោន ជាកីឡាករស៊ីថ្លៃបំផុតប្រចាំក្របខ័ណ្ឌ Bundesliga។ នេះបើតាមសារព័ត៌មាន AS បានចុះផ្សាយ៕
ប្រភព៖ SportBible