អតីតវីរបុរសលោក Teddy Sheringham បានធ្វើការជំរុញដល់ក្លឹបចាស់ Manchester United ឲ្យព្រមលក់ចេញ Cristiano Ronaldo នៅទីផ្សារដោះដូរសារនេះ ដោយមិនខ្វល់ថាបានតម្លៃខ្លួនប៉ុណ្ណាទេ តែត្រង់តម្លៃពលកម្មចាយលើកីឡាករព័រទុយហ្គាល់ គួរទុកបង្វិលចាយឲ្យចំណូលថ្មី បានដល់ ២-៣ រូប ជាជម្រើសល្អជាង។
បញ្ជាក់ថា United យកបានកីឡាករ ៣ រូបផ្លូវការនៅពេលថ្មីថ្មោង មាន Tyrell Malacia, Christian Eriksen, Lisandro Martinez ហើយក៏កំពុងផ្សារភ្ជាប់ទៅក្នុងចចាមអារ៉ាមជាច្រើនផ្សេងទៀតដែរ។ តាមការបញ្ជាក់ប្រាប់ The Mail អតីតខ្សែប្រយុទ្ធសញ្ជាតិអង់គ្លេសនិយាយ៖ “បើខ្ញុំជា Ronaldo ខ្ញុំទៅហើយ គឺអត់នៅទេ ដូចគ្នានឹង លោក Ten Hag បើគេចង់ទៅ គឺគួរតែអនុញ្ញាតឲ្យគេទៅ ហើយបើកទំព័រថ្មីសម្រាប់ United”។
លោកបន្ត៖ “អ្នកអាចយកលុយដែលចាយលើប្រាក់ឈ្នួល Ronaldo មកនាំចូលកីឡាករថ្មី ២ ឬ ៣ រូបបន្ថែម ព្រោះក្លឹបបានចាយលុយច្រើនណាស់មួយខែៗលើកីឡាករកន្លងមក ហើយត្រូវទទួលស្គាល់ បើកីឡាករចង់ចេញ ក៏ក្លឹបគួរទៅរកអ្នកថ្មី ដែលរឹងមាំ មានស្ថិរភាពអាចមកឆ្លងកាត់រដូវកាលដ៏តានតឹងជាមួយគ្នា”។ គួរបញ្ជាក់ថា បើនិយាយអំពីតំណែងប្រយុទ្ធ ក្លឹបក៏កំពុងចរចាជាមួយ Antony ជាសមាជិក Ajax មួយរូបផ្សេងទៀត៕
ប្រភព៖ The Mail