បើតាមសារព័ត៌មាន El Pais ចុះផ្សាយថា តួលេខ ដែលប្រភពជាច្រើនចុះថា Barcelona ចាយអស់ ៥០ លានអឺរ៉ូ លើការនាំយក Robert Lewandowski ចេញពី Bayern Munich នោះជាទិន្នន័យក្លែងក្លាយ ពោលជាចេតនារបស់អ្នកមានបុណ្យ ចង់លាក់បាំងទិន្នន័យពិត ដើម្បីបញ្ចៀសការរិះគន់ពីអ្នកគាំទ្រ។
ក្លឹបហាក់មិនចង់ឲ្យកើតមានមតិសាធារណៈ រិះគន់ពីរបៀបចាយលុយ ដែលចាយច្រើន ក្នុងពេលវេលាដែលក្លឹបកំពុងជួបប្រទះវិបត្តិហិរញ្ញវត្ថុ។ ប្រភពបានឲ្យដឹងថា តាមពិតទៅតួលេខចំណាយលើកីឡាករប៉ូឡូញ ពិតប្រាកដ គឺ ៦០ លានអឺរ៉ូឯណោះ ពោលតម្លៃចុះហត្ថលេខា ៤៥ លាន បូកនឹងកិច្ចព្រមព្រៀងឧបត្ថម្ភលក្ខខណ្ឌផ្សេងៗទៀត ១៥ លានអឺរ៉ូ។
ប្រសិនក្នុងករណី Lewandowski អាចជួយឲ្យក្រុមដឹកនាំដោយលោក Xavi Hernandez មានកៅអីលេង Champions League រដូវកាលបន្តបន្ទាប់ មានន័យថា ឈរពីលេខ ១ ដល់លេខ ៤ នោះក្លឹប Bayern នឹងបានប្រាក់ ៥ លានអឺរ៉ូបន្ថែម រួច ១០ លានអឺរ៉ូទៀត លើកិច្ចព្រមព្រៀងដទៃ ពាក់ព័ន្ធនឹងការបង្ហាញខ្លួនរបស់កីឡាករ។ នេះមានន័យថា Barca បានចាយ ៦០ លាន តែឆ្លៀតប្រាប់ទៅ Bayern ឲ្យបង្ហើបទៅខាងក្រៅ ត្រឹម ៥០ លានបានហើយ៕
ប្រភព៖ El Pais