អ្នកគាំទ្រកំពុងចង់ដឹងជាខ្លាំង អំពីគុណភាពរបស់ខ្សែប្រយុទ្ធវ័យក្មេង Erling Haaland ថានឹងអាចរកបានគ្រាប់បាល់ច្រើនកម្រិតណា ហើយកន្លងទៅ កីឡាករន័រវែសក៏បានបោះពាក្យគួរឲ្យចាប់អារម្មណ៍ ជុំវិញក្លឹបដែលជាសត្រូវចាស់របស់ឪពុកខ្លួន ពោលជាក្លឹបដែល Haaland នឹងចង់តតាំងបំផុតនៅ Premier League។
បើតាមការលើកឡើងរបស់អតីតខ្សែប្រយុទ្ធនៃក្លឹប Aston Villa លោក Gabriel Agbonlahor បានឲ្យដឹងថា Haaland មិនត្រឹមតែចង់ប្រជែងក្លឹបបិសាចក្រហម ក្នុងនាមជាសត្រូវរួមទីក្រុង Manchester ប៉ុណ្ណោះទេ ទៀតសោតគឺដើម្បីសងសឹកគំនុំចាស់ ដែលកីឡាករនៃក្លឹបមួយនេះហើយ ជាដើមចមធ្វើឲ្យឪពុកខ្លួនត្រូវដកឃ្លាពីបាល់ទាត់ទាំងអាយុមិនទាន់ ៣០។
នោះគឺរឿងរ៉ាវកើតឡើងកាលពីជាង ២០ ឆ្នាំមុន ដែលខ្សែបម្រើការពារ ២ ដួងនៅ Premier League រមែងប៉ះទង្គិចគ្នាខ្លាំង ដល់ចុងក្រោយនាំឲ្យម្នាក់របួសធ្ងន់ ហើយត្រូវបង្ខំចិត្តព្យួរស្បែកជើងពីបាល់ទាត់។ អ្នកបង្កបញ្ហាគឺ Roy Keane អតីតកីឡាករនៃក្លឹប Man Utd ហើយអ្នករងគ្រោះ ជាឪពុករបស់ Erling Haaland នោះគឺលោក Alf-Inge Haaland ជាអតីតកីឡាករនៃក្លឹប Man City។
វាបានកើតឡើងនៅខែមេសា ឆ្នាំ ២០០១ ក្នុងជំនួប Manchester Derby ដោយមិនច្បាស់ថា ជាចេតនារបស់ Kean ចង់សងសឹកឬបែបណា ព្រោះកន្លងមកអ្នកទាំងពីរធ្លាប់ប៉ះទង្គិចគ្នាច្រើនហើយ ដូចមុននោះឪពុក Haaland ក៏ធ្លាប់ធ្វើឲ្យ Keane ដួល ហើយចេញកាយវិការស្រែកគំហុកដាក់ លុះដល់ប្រកួតក្រោយអតីតកីឡាករអៀរឡង់ ក៏បង្កការប៉ះទង្គិចវិញ តែសារនេះធ្ងន់ ដោយ Keane សំដៅទៅធាក់ឪពុក Haaland មួយទំហឹង ដល់អស់ជើងដួលខ្ពោកលើទីលាន មុនអាជ្ញាកណ្តាលសម្រេចធ្វើការពិន័យកាតក្រហម។
តែយ៉ាងណា វាបានធ្វើឲ្យលោក Alf-Inge ក៏ដូចជាកូនប្រុសមានការចងចាំមិនភ្លេច ព្រោះដោយសាររបួសជង្គង់ដ៏ធ្ងន់ធ្ងរមួយនោះហើយ ទើបធ្វើឲ្យលោកត្រូវបង្ខំចិត្តសម្រាកព្យាបាលរបួស ប្រកាសដកឃ្លាពីបាល់ទាត់អស់រយៈពេល ៨ ឆ្នាំ។ តាមថាអាជីពរបស់លោក គួរតែជោគជ័យជាងនេះ ជាមួយ City តែចុងក្រោយបែរមានឱកាសបង្ហាញខ្លួនតែ ៤៥ ប្រកួត រកបាន ៣ គ្រាប់និង Assist ១ លើក។
ទាំងអស់នេះហើយនាំឲ្យមានការជឿជាក់ថា Erling Haaland នឹងមានចិត្តពុះកញ្ជ្រោលខ្លាំងក្នុងការយកឈ្នះ ឬបង្កើតភាពអាម៉ាស់ដល់ក្លឹប Man Utd ឲ្យចាក់ជ្រៅតាមដែលអាចធ្វើទៅបាន ព្រោះដើម្បីចង់ផ្ញើជោគជ័យទៅកាន់លោកឪពុកជាពិសេស ដែលជាកីឡាកររងគ្រោះដោយសារសមាជិកក្លឹបម្ចាស់ដី Old Trafford។
ដូចលោក Agbonlahor បាននិយាយ៖ “មិនត្រឹមតែ United ជាគូសត្រូវរបស់ City ប៉ុណ្ណោះទេ ហេតុផលចម្បងមួយទៀត គឺ Haaland នឹងមិនអាចបំភ្លេចបាននូវអ្វី ដែល Roy Keane បានធ្វើដាក់ឪពុករបស់គេ ដូច្នេះ Haaland នឹងតាមធ្វើទុក្ខបុកម្នេញ Man United ជារៀងរហូតទៅ ដរាបណាគេនៅឈរជើងក្នុងក្របខ័ណ្ឌ Premier League”។
“ខ្ញុំជឿថា វានឹងក្លាយជាប្រកួតដែលសឹងតែធ្វើឲ្យក្មេងប្រុសម្នាក់នេះខំលេងដល់ឆ្កួត រហូតអាចសម្រេចដល់គ្រាប់បាល់ Hat-trick ក៏ថាបាន និយាយទៅគេនឹងក្លាយជាកីឡាករដែលចង់បំផ្លាញ Man Utd ខ្លាំងបំផុតលើទីលាន”។ គួរបញ្ជាក់ថា កាលបរិច្ឆេទជួបគ្នារវាងក្លឹប Man Utd និង Man City នៅ Premier League រដូវកាលថ្មី កំណត់ធ្វើឡើងនាវេលាម៉ោង ០៩:០០ នាទីយប់ ថ្ងៃទី ១ តុលា មានផ្សាយផ្ទាល់លើទំព័រ CTS Sports៕