បន្ទាប់ពីចប់ការប្រកួតនៅទីក្រុងបាងកក ដែល Man Utd យកឈ្នះ Liverpool ៤-០ អារម្មណ៍អ្នកគាំទ្របាល់ទាត់ភាគច្រើន ក៏មិនទាន់ទៅណាឆ្ងាយ ពោលនៅក្រវែលជុំវិញស្ថានការណ៍ក្លឹបបិសាចក្រហមដដែល តែសារនេះ ផ្តោតខ្លាំងទៅលើអនាគត Cristiano Ronaldo។ មកទល់ពេលនេះ តារាឆ្នើមសញ្ជាតិព័រទុយហ្គាល់ នៅមិនទាន់ត្រលប់មកហ្វឹកហាត់នៅឡើយ ខណៈដែលការប្រកួតត្រៀមបើករដូវកាលទី ២ ត្រូវប៉ះ Melbourn Victory នៅទឹកដីអូស្ត្រាលី ក៏ត្រូវចូលមកដល់នៅវេលាល្ងាចថ្ងៃស្អែក។
តាមដំណឹងចុះផ្សាយដ៏ក្តៅគគុកពីសារព័ត៌មាន Daily Express បានឲ្យដឹងថា ក្លឹបមិនបញ្ជាក់អត្តសញ្ញាណច្បាស់មួយ នៅឯប្រទេសអ្នកមានអារ៉ាប៊ីសាអ៊ូឌីត បានដាក់សំណើទៅកាន់ក្លឹបអាណាព្យាបាល Man Utd ក៏ដូចជាកំពុងចរចាយ៉ាងសកម្ម រវាងភាគីរបស់ Ronaldo គឺភ្នាក់ងារលោក Jorge Mendes ជុំវិញការចង់នាំយកខ្សែប្រយុទ្ធ វ័យ ៣៧ ឆ្នាំ មកកាន់ទឹកដីទ្វីបអាស៊ី។
ប្រភពបានឲ្យដឹងថា ក្លឹបនៅប៉ែកមជ្ឈិមបូព៌ា បានដាក់សំណើចង់ថ្ពក់យក Ronaldo ដោយសន្យាព្រមផ្តល់ឲ្យ ៣០ លានផោន ជាតម្លៃផ្ទេរចេញ ទៅកាន់ក្លឹបម្ចាស់ដី Old Trafford ដែលទំហំនេះ នាំឲ្យ United នៅតែអាចចំណេញ ទេ្វប្រាក់ដើម ធៀបនឹងគ្រាដែលបានចាយទៅឲ្យ Juventus កាលពីមួយឆ្នាំមុន។
ទៀតសោតទៅមើលលក្ខខណ្ឌផ្តល់ឲ្យកីឡាករ គឺរង្គើអស់ឋានទាំង ៣ ពោលអាចរុញឲ្យ Ronaldo ឡើងឈរឈ្មោះជាកីឡាករស៊ីថ្លៃបំផុតក្នុងប្រវត្តិសាស្ត្របាល់ទាត់ ដោយមួយថ្ងៃអាចកើបចំណូលចូលហោប៉ៅជាង ៣៤២ ០០០ ដុល្លារអាមេរិក។ ក្នុងកិច្ចព្រមព្រៀងនោះ ភាគីក្លឹបចង់បាន សន្យាផ្តល់ឲ្យ Ronaldo នូវប្រាក់ពលកម្ម ១២៥ លានដុល្លារ/ឆ្នាំ ឬ ២៥០ ដុល្លារ លើកុងត្រារយៈពេល ២ ឆ្នាំ។ ចំណែកឯភ្នាក់ងាររត់ការលោក Mendes បើជួយឲ្យការចរចា សម្រេចទៅបាន ក៏នឹងទទួលប្រាក់ភាគលាភ ២៣ លានដុល្លារផ្សេងទៀតផងដែរ។
ទំហំប្រាក់ដ៏មហាសាលនេះ គុណចែកទៅ ត្រឹមចំណូលមួយថ្ងៃរបស់ Ronaldo នៅក្លឹបថ្មី គឺស្មើប្រាក់ឈ្នួលជិតមួយអាទិត្យពេញ នៅក្លឹបបច្ចុប្បន្ន Man Utd។ បើធៀបនឹងកីឡាករដទៃ វាក៏ច្រើនជាង Kylian Mbappe ជិត ១ ទ្វេជា ២ ហើយអាចច្រើនជាង ១ ទ្វេជា ៣ ធៀបនឹង Lionel Messi ជាកំពូលកីឡាករស៊ីថ្លៃនៅក្លឹប Paris Saint-Germain។
មកទល់ពេលនេះ យើងមិនទាន់អាចដឹងថាជាក្លឹបយក្សណាមួយឡើយ ហើយក៏មិនទាន់ដឹងដូចគ្នា ថាមហាសេដ្ឋី ឬព្រះអង្គម្ចាស់ណាដែលនៅពីក្រោយក្លឹបមួយនោះដែរ។ ក៏ប៉ុន្តែ CTS Sports មានការសង្ស័យទៅលើក្លឹប ៣ ដែលជាក្លឹបជោគជ័យបំផុតនៅលីគកំពូល Saudi Professional League របស់អារ៉ាប៊ីសាអ៊ូឌីត គឺរួមមាន Al-Hilal, Al-Nassar និង Al Ittihad។
តែយ៉ាងណា បើតាមការប្រមើលមើល ប្រសិនជាក្លឹបទាំងបីមានលទ្ធភាពប្រហែលគ្នាពិតមែន នោះក៏ទំនងជា Al Ittihad ដែលគួរតែយកបាន Ronaldo ព្រោះក្លឹបកំពុងមានអ្នកចាត់ការរួមសញ្ជាតិព័រទុយហ្គាល់ នៅឈរជើងស្រាប់ នោះគឺវត្តមានលោក Nuno Espirito Santo។ ចុះមតិយោបល់គ្នាយើងវិញ បើអាចស្រមៃយកបានវត្តមាន Ronaldo មកកាន់ទឹកដីអាស៊ី តើក្លឹបណាមួយ ដែលអ្នកចង់ឃើញបំផុត?
ប្រភព៖ បរទេស