ក្លឹបនៅអង់គ្លេសជាច្រើន បានផ្សារភ្ជាប់ទៅក្នុងចចាមអារ៉ាមជុំវិញការនាំចូលកីឡាករថ្មី ត្រៀមសម្រាប់រដូវកាល ២០២២/២៣ ហើយចំណោមនោះ គេផ្ទុះការចាប់អារម្មណ៍ខ្លាំង ទៅលើក្លឹបតោខៀវ Chelsea និងបិសាចក្រហម Manchester United។
ងាកមកក្នុងអត្ថបទនេះ CTS Sports ធ្វើការសង្ខេបនូវគ្រប់ជ្រុងនៃចចាមអារ៉ាមទាំងអស់ ហើយច្របាច់ចូលជាឈុត ១១ រូបល្អបំផុត របស់ក្លឹបយក្សទាំង ២ ប្រសិនជាអាចនាំចូល ដូចការគ្រោងទុក៖
១) ប្រព័ន្ធ ៤-៣-៣ របស់ក្លឹប Chelsea៖
តំណែងអ្នកចាំទី គឺនៅតែអាចធានាបានថាលោក Thomas Tuchel នឹងបន្តប្រើប្រាស់ Edouard Mendy ពោលគ្មានការគិតគូរនាំយកអ្នកថ្មីឡើយ។ ចំណែកដៃគូការពារកណ្តាល គេរំពឹងទុកថា Thiago Silva អាចនឹងទទួលបានដៃគូថ្មី គឺ Matthijs de Ligt ពីក្លឹប Juventus តែទាមទារឲ្យ Chelsea ត្រូវហ៊ានចាយលុយច្រើនជាង ៦៥ លានផោន។ ប៉ះទៅស្លាបឆ្វេងស្តាំ នៅជើងក្រោម ក៏នឹងមិនមានការផ្លាស់ប្ដូរអ្វីដែរ ពោលបន្តប្រើ Reece James នៅស្លាបស្តាំ ហើយ Ben Chilwell នៅស្លាបឆ្វេង ក្រោយជាសះស្បើយពីរបួស។
ទៅដល់តំបន់បម្រើទាំង ៣ រូប ក៏ជឿជាក់អ្នកចាត់ការសញ្ជាតិអាល្លឺម៉ង់ នឹងបន្តប្រើដូចរដូវកាលចាស់ ពោលមាន N’Golo Kante នៅបម្រើការពារ អមដោយបម្រើសងខាង មាន Mason Mount និង Mateo Kovacic។
យើងទៅមើលតំបន់ប្រយុទ្ធ តំបន់កណ្តាល បើមើលតាមស្ថានភាព អ្នកសក្តិសមបំផុត គួរតែ Kai Havertz មិនមែន Romelu Lukaku ឬ Timo Werner ។ រីឯប្រយុទ្ធស្លាបឆ្វេង ក្លឹប Chelsea កំពុងចរចាដុតដៃដុតជើង ចង់បានខ្លាំងនូវវត្តមាន Raheem Sterling ចេញពីក្លឹប Manchester City ហើយស្លាបស្តាំ ក៏ចង់គាស់គីឡូថ្មី ញាត់ចូល Raphinha យកចេញពីក្លឹប Leeds United។ បើតាមខ្ទង់ចំណាយលើការចែចូវកីឡាករថ្មី ៣ រូប ក្នុងឈុតនេះ គឺមិនក្រោម ១៥០ លានផោនឡើយ។
២) ប្រព័ន្ធ ៤-២-៣-១ របស់ក្លឹប Man Utd៖
David de Gea នៅតែអាចធានាតំណែងអ្នកចាំទីឲ្យក្លឹប Man Utd តែនៅតំបន់ការពារ អាចនឹងមានការរុះរើច្រើន តួយ៉ាងគឺស្លាបឆ្វេង បានឃើញហើយពីការនាំចូល Tyrell Malacia ខណៈស្លាបស្តាំ ទំនងបន្តប្រើប្រាស់ Diogo Dalot ដូចកាលពីចុងរដូវកាលចាស់។ យ៉ាងណានៅជញ្ជាំងការពារកណ្តាល លោក Erik ten Hag បានដាក់គោលដៅធំ ចង់នាំយកកូនក្រុមចាស់ Lisandro Martinez ពីក្លឹប Ajax មកចាប់ដៃគូជាមួយប្រធានក្រុម Harry Maguire។
ចំណែកឯតំបន់បម្រើ ក៏ក្លឹបម្ចាស់ដី Old Trafford ចាប់អារម្មណ៍លើគោលដៅច្រើនដែរ ក្រោយពេលមានការចាកចេញជាបន្តបន្ទាប់ នៃ Jesse Lingard, Juan Mata និង Paul Pogba ជាដើម។ អ្នកថ្មី ២ រូប កំពុងស្ថិតក្នុងបញ្ជីចង់នាំចូល រួមមាន Christian Eriksen និង Frenkie de Jong។ កីឡាករដាណឺម៉ាក អាចឲ្យ United យកចូល នៅលក្ខខណ្ឌឥតតម្លៃខ្លួន តែករណីកីឡាករហូឡង់ ត្រូវចាយលុយសុទ្ធ ច្រើនជាង ៦០ លានផោន។
ទៅដល់តំបន់បម្រើប្រយុទ្ធ Bruno Fernandes នៅតែសង្ឃឹមខ្ពស់ នឹងអាចធានាតំណែងជម្រើស ១១ នាក់ដំបូង ស្របពេលប្រយុទ្ធស្លាបឆ្វេង ទំនងដាក់ Jadon Sancho អមដោយស្លាបស្តាំ ជាកីឡាករវ័យក្មេង Anthony Elanga។ រសើបខ្លាំង គឺនៅប្រយុទ្ធជួរមុខ ប្រហែលលែងមានវត្តមាន Cristiano Ronaldo ក្រោយកើតមានតម្រុយចង់ចាកចេញ រួចក្លឹបបានមានកូនចិត្ត ចង់នាំយកម្ចាស់អាវលេខ ១០ Paulo Dybala មកបំពេញជំនួស ក្នុងលក្ខខណ្ឌផ្ទេរ ដោយមិនចំណាយលុយសូម្បីមួយសេន្ត។ តើអ្នកគាំទ្ររាល់គ្នាយល់ឃើញបែបណាដែរ គិតថាប្រព័ន្ធថ្មីទាំងនេះ ល្អគ្រប់គ្រាន់ ឬនៅមានចំណុចខ្វះខាតណាមួយដែលគួរកែតម្រូវ?
ប្រភព៖ បរទេស