ទឹកមាត់ប្រៃ Thiago Silva ដែលបានបញ្ជូនសំណើទៅថ្នាក់លើ ដោយចង់ឲ្យក្លឹបចាត់ចែងការនាំយក Neymar Jr ឥឡូវទទួលបានផលហើយ ពោលក្លឹបពិតជាបានបញ្ជូនអ្នកឃ្លាំមើលទៅចរចារវាងភាគីភ្នាក់ងាររបស់កីឡាករប្រេស៊ីលពិតមែន។
តាមសារព័ត៌មាន ESPN ចុះផ្សាយថា ការចង់បានរបស់ Silva គឺមានភាគរយអាចក្លាយទៅជាការពិត ព្រោះពេលនេះ ភាគីក្លឹប និងភ្នាក់ងាររបស់ខ្សែប្រយុទ្ធក្លឹប PSG កំពុងស្ថិតក្នុងការចរចា ដើម្បីសិក្សាមើលលើកិច្ចព្រមព្រៀងដ៏សមរម្យមួយ។ ជាការពិត បើផ្ទេរមកក្លឹបម្ចាស់ដី Stamford Bridge លុះត្រាណាតែ Neymar ព្រមបន្ទាបតម្លៃពលកម្ម ឲ្យទាបជាងបច្ចុប្បន្ន ដែលរកបាននៅ PSG ទើបមិនប៉ះពាល់ដល់ស្ថានភាពក្លឹប។
សុពលភាពកុងត្រារបស់ Neymar នៅសេសសល់ដល់ចុងខែមិថុនា ឆ្នាំ ២០២៥ ឯណោះ រីឯហាងឆេងតម្លៃខ្លួន អាចថ្លៃដល់ល្បាក់ ៩០ លានផោន។ យ៉ាងណាក្រៅតែពី Chelsea ក៏មានក្លឹប Man Utd និង Newcastle ដាក់ចិត្តចាប់អារម្មណ៍ចង់បានដូចគ្នា។ ទៅមើលស្ថិតិរដូវកាលចាស់របស់កីឡាករវ័យ ៣០ ឆ្នាំបន្តិច បង្ហាញខ្លួន ២៨ ប្រកួត រកបាន ១៣ គ្រាប់និង Assist ៨ លើក៕
ប្រភព៖ ESPN