Fulham នឹងជាចំណែកមួយក្នុងចំណោមក្លឹបទាំង ២០ នៅ Premier League ដែលត្រូវបើកការប្រកួតរដូវកាលថ្មី នារយៈពេលជាង ១ ខែបន្ទាប់។ មកដល់ទីផ្សារដោះដូរដែលកំពុងបើកទ្វារ ក្លឹបទើប Promote ឡើងមួយនេះ ក៏លេចលឺថាបានចាប់អារម្មណ៍ទៅលើកូនបិសាច ដែលមិនទទួលបានពេលវេលាឈរជើងលើទីលាន ហើយចង់យកមកក្លាយជាតួឯកនៅក្លឹបរបស់ខ្លួន។
នោះគឺខ្សែការពារកណ្តាល Eric Bailly ដែលសេសសល់កុងត្រារយៈពេល ២៤ ខែទៀត ហើយក៏លេចលឺថាក្លឹបមានបំណងចង់វ៉ៃចេញផងដែរ។ ស្ថិតិរដូវកាលចាស់ កីឡាករសញ្ជាតិកូឌីវ័រឈរជើងតែ ៤៨៧ នាទី ស្មើនឹង ៧ ប្រកួតគត់ឲ្យក្រុមម្ចាស់ដី Old Trafford។ តំណែងរបស់គេត្រូវបានបំពេញដោយ Harry Maguire, Raphael Varane និង Victor Lindelof ជាដើម។
ទោះជាយ៉ាងណា បើតាម Sky Sports News ចុះផ្សាយថា Fulham មានបំណងចង់ខ្ចីជើងកីឡាករវ័យ ២៨ ឆ្នាំខាងលើ អមនឹងការបំពេញកិច្ចព្រមព្រៀងទិញផ្តាច់កុងត្រានៅពេលបន្ទាប់។ តាមដឹងសាមីខ្លួនពិតជាមិនចង់ចាកចេញទេ តែបើក្លឹបបង្ខំក៏ពិបាកនឹងដាក់ចិត្តបន្តនៅដែរ ណាមួយក្លឹបក៏ល្ហិចល្ហៀងត្រៀមយកខ្សែការពារថ្មី Lisandro Martinez ថែមម្នាក់ទៀត ដូច្នេះឱកាសសម្រាប់ Bailly ប្រាកដជាកាន់តែខ្ទាតឆ្ងាយ៕
ប្រភព៖ Sky Sports News