ក្រុមបាល់ទាត់ Cambodian Football All Stars ឬហៅកាត់ CFA បានប្រកាស ថានឹងធ្វើដំណើរទៅកាន់ខេត្តកំពង់ស្ពឺនាថ្ងៃអាទិត្យ វេលាម៉ោង ០៣:០០ នាទីរសៀល ទី ០៣ ខែកក្កដា ឆ្នាំ ២០២២ ណាត់ប៉ះគ្នាទល់ក្រុម Kompong Speu United ជាម្ចាស់ផ្ទះ នៅទីលានបាល់ទាត់វិទ្យាល័យកំពង់ស្ពឺ។
សូមបញ្ជាក់ថា កំពង់ស្ពឺ ជាខេត្តទី ៣ ហើយបន្ទាប់ពីខេត្តព្រៃវែង ដែលក្រុម CFA ធ្លាប់បានធ្វើដំណើរទៅ ហើយតាមគោលដៅដូចបានកំណត់របស់ក្រុម គឺចង់មានការប្រកួតមិត្តភាពបែបនេះ នៅទូទាំង ២៥ ខេត្ត/ក្រុង ក្នុងប្រទេសកម្ពុជា។ ក្រុមមានអាយុកាលជិត ៣ ឆ្នាំមួយនេះ តែងតែឈរលើពាក្យស្លោក «លេងកីឡាដើម្បីសុខភាព និង ជៀសឆ្ងាយពីគ្រឿងញៀន»។
រំឭកឲ្យដឹង នៅចុងសប្តាហ៍ ខាងមុខនេះដែរ ក្រៅតែពីជាការប្រកួតមិត្តភាពឆ្លងខេត្ត របស់ CFA បន្តពីនោះសមាជិកក្រុមក៏នឹងជួបជុំគ្នា ដើម្បីទៅកម្សាន្តនៅឯសួនទឹកនៃទីរួមខេត្តកំពង់ស្ពឺ។ នេះសបង្ហាញថា ក្រៅតែពីការលេងដើម្បីសុខភាព ទៀតសោតបាល់ទាត់ក៏ជាការប្រមូលផ្តុំ បង្កើតជាមិត្តភាព សាមគ្គីភាព និងទំនាក់ទំនងឲ្យកាន់តែប្រសើរឡើងផងដែរ សម្រាប់ប្រយោជន៍ក្រៅទីលាន៕