នៅរយៈពេលចុងក្រោយ ខ្ទង់ចំណាយរបស់ក្លឹប Manchester United ហាក់ខ្ពស់ជាងចំណូល ជាពិសេសជួនពេលក្លឹបកំពុងធ្លាក់ទម្រង់លេងផង មិនបានលេងពានអឺរ៉ុប UEFA Champions League ផង ដូច្នេះលុយចូលក្លឹបមួយចំនួន ក៏នឹងត្រូវបានកាត់បន្ថយទៅតាមនោះដែរ។ លាយឡំនឹងបញ្ហាធំៗ ២ ផ្សេងទៀត ក៏នាំឲ្យក្លឹបម្ចាស់ដី Old Trafford ត្រូវបានគេរាយការណ៍ថា ប្រឈមនឹងត្រូវជាប់ជំពាក់បំណុលដល់ទៅ ១ ពាន់លានផោននាពេលខាងមុខ។
ដូចបានបញ្ជាក់ពីនាយកប្រតិបត្តិថ្មី លោក Richard Arnold កាលពីវីដេអូបែកធ្លាយថ្ងៃមុន ១) ក្លឹបបិសាចក្រហមកំពុងជួបបញ្ហាក្នុងការរកមូលនិធិដើម្បីអភិវឌ្ឍធ្វើឲ្យល្អប្រសើរឡើងនូវកីឡដ្ឋាន Old Trafford ២) ក៏ដូចជាត្រូវការកញ្ចប់ចំណាយជាច្រើនផ្សេងទៀត មកជួសជុលទីលានហ្វឹកហាត់ Carrington ដែលផ្នែកជាច្រើន រងការខូចខាតទុកចោលច្រើនឆ្នាំមកហើយ។
បើតាមសារព័ត៌មាន The Mirror ចុះផ្សាយថា បើបញ្ហានៅតែបន្តមាន ហើយចំណូលបន្តធ្លាក់ចុះ នោះពេលទៅមុខ ក្លឹប Man Utd ក៏អាចនឹងត្រូវបង្ខំចិត្តលក់សិទ្ធប្រើប្រាស់ឈ្មោះកីឡដ្ឋាន ដោយលុប Old Trafford ទៅជាឈ្មោះក្រុមហ៊ុនម្ចាស់ឧបត្ថម្ភធំណាមួយក៏ថាបាន ពោលដូចគន្លង Barcelona សហការប្តូរពី Camp Nou ទៅជា Spotify កាលពីពេលថ្មីថ្មោង។
បច្ចុប្បន្ននេះ ក្លឹបជាប់បំណុល ៥០០ លានផោន ហើយតួលេខអាចនឹងកាន់តែកើនឡើងទៅដល់ ១ ពាន់លានផោននាពេលដ៏ខ្លីខាងមុខ បើតាមការព្យាករណ៍។ ទោះជាយ៉ាងណា ពាក់ព័ន្ធកញ្ចប់ចំណាយសម្រាប់អ្នកចាត់ការលោក Erik ten Hag ក៏ត្រូវបានគេបញ្ជាក់ ថាក្លឹបនៅតែបានរៀបចំគ្រប់គ្រាន់លើការចាយវាយនៅទីផ្សារដោះដូរខាងមុខ៕
ប្រភព៖ The Mirror