មានចចាមអារ៉ាមថាក្លឹប Arsenal កៀកនឹងសម្រេចការប្រកាសផ្លូវការ នូវការនាំចូល Gabriel Jesus នៅតម្លៃខ្លួន ៤៥ លានផោនពី ក្លឹបមេឃខៀវ Manchester City ពោលអាចជាប្រកាសនៅថ្ងៃនេះ ឬថ្ងៃស្អែក។ ទោះជាយ៉ាងណាងាកទៅមតិលោក Darren Bent បែរយល់ឃើញផ្សេង ហើយជឿថា ការនាំយក Romelu Lukaku គឺជាជម្រើសដ៏សក្តិសមជាង។
កីឡាករសញ្ជាតិបែលហ្សិក ធ្វើមិនបានល្អទេ ឲ្យក្លឹបតោខៀវ Chelsea នៅរដូវកាលចាស់ ពោលធ្លាក់ជើង បង្ហាញខ្លួន ៤៤ ប្រកួត រកបានតែ ១៥ គ្រាប់និង Assist ២ លើកប៉ុណ្ណោះ។ ប្រាប់ទៅ talkSPORT លោក Bent ថា៖ “ខ្ញុំនឹងចុះហត្ថលេខាយក Lukaku នៅលក្ខខណ្ឌខ្ចីជើង ១០០ ភាគរយ ដោយអត់ស្ទាក់ស្ទើរទេ នេះខ្ញុំជឿថា Lukaku គេចង់ទៅកន្លែងណា ដែលទទួលបានការស្រលាញ់ធំបំផុត ដូចកាលនៅ Inter Milan អ៊ីចឹង គេអស្ចារ្យណាស់”។
សួរនាំរវាងការចុះហត្ថលេខាយក Lukaku ឬ Jesus ក៏ស្រាប់តែ Bent ឆ្លើយមួយម៉ាត់យ៉ាងខ្លី៖ “គឺ Lukaku ហើយ គេប្រាកដជានឹងរកបានគ្រាប់បាល់ទៀងទាត់ឲ្យក្លឹបជាក់ជាមិនខាន”។ រំឭកឲ្យដឹង បើខ្ចីជើងកីឡាករវ័យ ២៩ ឆ្នាំ នោះមួយរដូវកាល អាចតម្រូវឲ្យ Arsenal ចាយលុយ ១០ លានផោន បូកនឹងការទូទាត់ប្រាក់ពលកម្មមួយផ្នែកផ្សេងទៀត៕
ប្រភព៖ TalkSPORT