ក្លឹបតោខៀវ Chelsea ត្រូវបានគេរាយការណ៍ថា ដាក់តម្លៃកីឡាករ Cesar Azpilicueta និង Marco Alonso ចេញមកហើយ ពោលចង់បង្ខំការលក់ចេញ ឲ្យកើតឡើងទៅបានត្រឹមទីផ្សារដោះដូរខាងមុខ។ នេះជួនពេលដែលមានក្លឹបចាប់អារម្មណ៍ស្រាប់ គឺ Barcelona នៃលីគកំពូលអេស្ប៉ាញ។
តាមរបាយការណ៍ពី Sport ចុះផ្សាយថា Barcelona ចង់បានអ្នកទាំងពីរ មកបំពេញស្លាបខាងក្រោយ ដោយ Azpilicueta ចង់យកមកលេងស្លាបស្តាំ ហើយ Alonso លេងស្លាបឆ្វេង។ ខាងក្លឹបតោខៀវ Chelsea ដាក់តម្លៃពួកគេទាំងពីរ បូកបញ្ចូលគ្នា ២៦ លានអឺរ៉ូ មានន័យថា ម្នាក់ទារ ១៣ លានអឺរ៉ូជាកំហិត។
កីឡាករសុទ្ធសឹងសេសសល់សុពលភាពកុងត្រាដល់ចុងខែមិថុនា ឆ្នាំ ២០២៣ ដូចគ្នា អ៊ីចឹងក្លឹបនឹងបង្ខំលក់ចេញ ជាជាងរក្សាទុកដល់អស់តម្លៃខ្លួន។ បន្ទាប់ការលក់ចេញបានសម្រេច នោះក្លឹបដឹកនាំដោយលោក Thomas Tuchel ក៏នឹងយកលុយទៅពន្លឿនល្បឿន លើការចរចាយក Jules Kounde ចេញពីក្លឹប Sevilla ដើម្បីមកប៉ះប៉ូវវិញ៕
ប្រភព៖ Sport