បន្ទាប់ការចាកចេញរបស់ Sadio Mane ឥឡូវអ្នកគាំទ្រ Liverpool ក៏ត្រូវត្រៀមចិត្ត ទទួលការចែកផ្លូវនៃសំណាក់តារាឆ្នើមមួយរូបផ្សេងទៀត គឺ Mohamed Salah ក្រោយការចរចាបន្តកុងត្រាថ្មី ហាក់មិនបញ្ចេញភ្លើងខៀវ ជាចម្លើយវិជ្ជមានទាល់តែសោះ។ បុរសវ័យ ៣០ ឆ្នាំ កំពុងស្ថិតនៅឆ្នាំចុងក្រោយ ជាមួយកុងត្រាសេសសល់រយៈពេល ១២ ខែ ហើយភាគរយច្រើនគេជឿថា បើកុងត្រាថ្មី ចរចាមិនត្រូវ នោះផ្លូវបែក គឺប្រាកដជាកើតឡើង រីឯសំណាក់ក្លឹបអាណាព្យាបាលក៏បានគិតដូចគ្នា ព្រោះដើម្បីប្រមូលលុយមួយចំនួនចូលក្លឹប ជាជាងរក្សាវត្តមានកីឡាករដល់អស់តម្លៃខ្លួន។
ខ្សែប្រយុទ្ធសញ្ជាតិអេហ្សីប ត្រូវបានគេជឿជាក់ ថាបានទាមទារកុងត្រាថ្មីរយៈពេល ៥ ឆ្នាំពីក្លឹបម្ចាស់ដី Anfield ហើយថ្លៃពលកម្ម ចង់បានខ្ពស់ជាងកីឡាករស៊ីថ្លៃប្រចាំក្លឹបបច្ចុប្បន្ន គឺ Virgil van Dijk ដល់ទៅ ១៦០ ០០០ ផោនឯណោះ។ មានន័យថា Salah ចង់បានប្រាក់ឈ្នួល ៤០០ ០០០ ផោន/សប្តាហ៍ ដែលនេះគុណជិត ១ ទ្វេជា ២ ធៀបនឹងប្រាក់ឈ្នួលសព្វថ្ងៃ ហើយខ្ពស់ជាងឆ្ងាយ ធៀបនឹងខ្សែការពារហូឡង់ ទទួលបានត្រឹម ២៤០ ០០០ ផោន។ ទំហំនេះ នៅមិនទាន់រាប់បញ្ចូលទាំងកិច្ចព្រមព្រៀង ផ្តល់ជូនប្រាក់ឧបត្ថម្ភដទៃផ្សេងទៀត។
បើតាមការចុះផ្សាយរបស់ The Sun បានឲ្យដឹងថា ក្លឹបម្ចាស់ដី Anfield នឹងសម្រេចថា មិនព្រមតាមសំណើកីឡាករអេហ្សីបនោះទេ ព្រោះច្បាស់លាស់មិនចង់បំបែករចនាសម្ព័ន្ធនៃការចំណាយលើថ្លៃពលកម្ម ពោលនឹងគ្មានការបន្ថែមខ្ទង់ចំណាយលើសពេលបច្ចុប្បន្ន តែតាមសំណើរបស់កីឡាករនោះឡើយ។ នេះវាក៏ជាមូលហេតុ ដែលនាំឲ្យកីឡាករសេណេហ្គាល់ Mane ជ្រើសយកផ្លូវបែក និងផ្ទេរទៅក្លឹប Bayern Munich កាលពីពេលថ្មីថ្មោង។
ទៅមើលតម្លៃលក់ចេញ ដែល Liverpool ចង់បានពីការផ្ទេរ Salah គឺកំណត់ទាបជាងទីផ្សារទៅទៀត ពោលសុំត្រឹមតែ ៦០ លានផោន នឹងព្រមអនុញ្ញាតឲ្យ Top Scorer រដូវកាលចាស់ដើរចេញទៅហើយ។ ទំហំនេះ វាទាបជាងហាងឆេងដែលប្រភពជាច្រើនវាយតម្លៃឲ្យ Salah ដល់ល្បាក់ ៩០ ទៅជាង ១០០ លានផោន។
គួរបញ្ជាក់ដែរថា បើផ្អែកតាមចចាមអារ៉ាម ទ្រនំធំ ២ ដែលចង់ត្រងយក Salah មានក្លឹប Barcelona និង Real Madrid តែតាមការជឿជាក់ ប្រាកដណាស់ស្តេចស មានប្រៀបខ្ពស់ជាង បើយើងគិតលើការចំណាយ។ ចាយពេលឲ្យហង្ស ២៥៤ ប្រកួត រកបាន ១៥៦ គ្រាប់និង Assist ៦៣ លើក រួចក៏បានឈ្នះរួចរាល់នូវពានរង្វាន់ Premier League និង Champions League។
បង្វែរទៅព័ត៌មានគួរឲ្យចាប់អារម្មណ៍មួយផ្សេងទៀត ក្លឹបកាំភ្លើងធំ Arsenal ឯណោះ ក៏លេចលឺថាកៀកនឹងប្រកាសការផ្ទេរចូល Gabriel Jesus ជាផ្លូវការ ពោលទំនងជាកើតឡើងនៅថ្ងៃអាទិត្យ ឬថ្ងៃចន្ទសប្តាហ៍ក្រោយ។ តាមសេចក្តីរាយការណ៍ពីលោក Fabrizio Romano បានឲ្យដឹងថា នាយកជាន់ខ្ពស់លោក Edu របស់ Arsenal បាននឹងកំពុងសកម្ម ដើម្បីសម្រេចកិច្ចព្រមព្រៀងរវាងភាគី Man City ជាមួយការទម្លាក់ចុងប៊ិចលើកុងត្រាថ្មីសន្លាង រយៈពេល ៥ ឆ្នាំ។ គេជឿថាការផ្ទេរចេញសារនេះ អាចថ្លៃប្រហែល ៤៥ លានផោន។ ការនាំយកកីឡាករប្រេស៊ីល គឺជាការមកបំពេញកន្លែងរបស់ Alexandre Lacazette ក៏ដូចជា Pierre-Emerick Aubameyang ដែលបានចាកចេញនៅរដូវកាលចាស់៕
ប្រភព៖ បរទេស