Vinicius Jr គឺជាអ្នករកបានគ្រាប់បាល់ជ័យជម្នះ ឲ្យក្លឹប Real Madrid យកឈ្នះ ១-០ ទៅលើ Liverpool កាលពីវគ្គផ្ដាច់ព្រ័ត្រ ពានរង្វាន់ UEFA Champions League ហើយពេលនេះ គេកំពុងទទួលបានការចាប់អារម្មណ៍ខ្លាំងពីសំណាក់ក្លឹបយក្សនៅទូទាំងតំបន់អឺរ៉ុប។ តែយ៉ាងណា កីឡាករប្រេស៊ីលបានសម្រេចចិត្តខុសស្រឡះពី Kylian Mbappe ដោយនេះមិនបានបោះចោលក្តីស្រមៃ ដើម្បីទៅស្រវាលុយធំនោះទេ ផ្ទុយទៅវិញ គឺនៅបន្តដើរតាមបេះដូងដដែល ហើយស៊ូបន្តកើបលុយតូចនៅក្លឹបបច្ចុប្បន្នរបស់ខ្លួន។
ជាការពិតក្លឹបសេដ្ឋី Paris Saint-Germain ក្រៅតែពីជោគជ័យលើការបន្តកុងត្រាថ្មី ឲ្យ Mbappe បន្ថែមពីលើនោះ ក៏ដាក់ផែនការណ៍ចង់ថ្ពក់យកគ្រាប់ពេជ្រ Vinicius ចេញពីក្លឹបនៅឯទឹកដីអេស្ប៉ាញ ក៏ប៉ុន្តែ ចុងក្រោយការចរចា មិនទទួលបានជោគជ័យ។ នេះកីឡាករវ័យ ២១ ឆ្នាំបានច្រានចោលការផ្តល់ជូនដ៏ធំមហាសាល ៣ ពីសំណាក់ក្លឹប PSG។
១) ប្រាក់ពលកម្ម ៤០ លានអឺរ៉ូ/ឆ្នាំ
បើ Vinicius ព្រមមកចុះចូលនៅ PSG នោះក្លឹបនឹងសន្យាផ្តល់ប្រាក់ពលកម្មសុទ្ធ ប្រមាណ ៤០ លានអឺរ៉ូ/ឆ្នាំ ដោយទំហំនេះ អាចរុញឲ្យគេក្លាយជាកីឡាករលំដាប់ទី ២ ស៊ីថ្លៃបំផុតប្រចាំក្លឹប PSG បន្ទាប់ពី Mbappe រកបានជិត ៦០ លានអឺរ៉ូ។ នេះច្រើនជាងទាំង Messi ទទួលបាន ៣៨ លានអឺរ៉ូ ខណៈ Neymar បានតែ ៣៤ លានអឺរ៉ូប៉ុណ្ណោះ។
២) ប្រាក់ឧបត្ថម្ភជាច្រើនទៀត
ដូចកុងត្រារបស់ Mbappe ប្រាក់ពលកម្មសុទ្ធ ជិត ៦០ លានអឺរ៉ូ តែប្រាក់ឧបត្ថម្ភផ្សេងៗទៀត អាចឡើងដល់ជិត ១០០ លានអឺរ៉ូ ឲ្យតែកីឡាករអាចសម្រេច ទៅតាមគោលដៅដែលក្លឹបចង់បាន។ វាមិនខុសគ្នានឹង Vinicius នោះឡើយ ព្រោះជឿថា PSG ក៏នឹងឲ្យតម្លៃមកលើយុវជនសញ្ជាតិប្រេស៊ីល ប្រហែលគ្នានឹងកីឡាករបារាំងផងដែរ។ តែយ៉ាងណា Vinicius មើលឃើញថា លុយទាំងនោះ មិនអាចកាត់កង ស្មើនឹងទំហំទឹកចិត្តដែលខ្លួនស្រលាញ់មកលើក្លឹប Real Madrid បានឡើយ។
៣) ការផ្តល់ឱកាសរកស៊ីជំនួញធំ នៅប្រទេសកាតារ
កាតារជាប្រទេសអ្នកមានមួយនៅទ្វីបអាស៊ី ហើយមហាសេដ្ឋីនៅទីនោះ ក៏ជាសម្ព័ន្ធកាន់កាប់ក្លឹប PSG ផងដែរ។ ហេតុនេះ ក្រៅពីផ្តល់ផលចំណេញលើទីលាន បង្វែរទៅក្រៅទីលាន ក្លឹបក៏ថែមទាំងសន្យានឹងធានានូវឱកាសរកស៊ី ឬការបង្កើតអាជីវកម្មធំដុំណាមួយនៅទឹកដីប្រទេសកាតារថែមទៀតផង។ នេះបើ Vinicius ចាប់យក វាជារឿងអស្ចារ្យមួយហើយ ព្រោះទើបតែស្ថិតនៅវ័យ ២១ ឆ្នាំ ក៏អាចមានធនធានជាដុំកំភួននៅប្រទេសអ្នកមាន អ៊ីចឹងពេលទៅមុខក្រោយចូលនិវត្ត ទោះអស់ពីអាជីពបាល់ទាត់ ក៏រំពឹងនឹងសល់លុយចាយធូរដែរ តែចម្លើយរបស់កីឡាករគឺនៅតែ Say “No” ទៅកាន់ក្លឹប PSG។
ចុងក្រោយតាមការចុះផ្សាយពីលោក Fabrizio Romano បានឲ្យដឹងថា Vinicius ទីបំផុតក៏ព្រមព្រៀងការបន្តកុងត្រាថ្មី ជាមួយក្លឹប Real Madrid ដោយបន្ថែមពីលើកុងត្រាចាស់ដែលត្រូវផុតនៅឆ្នាំ ២០២៤ មកទល់ចុងខែមិថុនា ឆ្នាំ ២០២៧។ នេះអាចបន្ថែមប្រាក់ពលកម្មដល់កីឡាករតែ ១០ លានអឺរ៉ូ/រដូវកាលប៉ុណ្ណោះ ជាមួយនឹងលក្ខខណ្ឌចងជើង គឺតម្លៃផ្តាច់កុងត្រា ១ ពាន់លានអឺរ៉ូ។ ទោះជាយ៉ាងណាកីឡាករក៏នៅតែរីករាយនឹងបន្តនៅ ហើយបន្តលេងទាំងស្នាមញញឹម ឲ្យក្លឹបក្នុងក្តីស្រមៃដែលកំពុងជោគជ័យស្រាប់៕
ប្រភព៖ បរទេស