Angel di Maria ធ្លាប់ហែលកាត់អស់ហើយនៅការលេងជាមួយកំពូលកីឡាករជាច្រើន មិនថាតែនៅកម្រិតក្លឹបនិងអាជីព។ បុរសវ័យ ៣៤ ឆ្នាំ កន្លងទៅ ទើបប្រកាសចាកចេញពីក្លឹប Paris Saint-Germain តែមិនទាន់បង្ហើបនៅឡើយ ថានឹងផ្ទេរទៅទ្រនំថ្មីណាមួយ។
ងាកទៅអាជីពនៅក្លឹប ដូចកាលនៅ Real Madrid, Man Utd, PSG និងនៅជម្រើសជាតិអាហ្សង់ទីន Di Maria ធ្លាប់បានរួមជើងនឹង Cristiano Ronaldo, Wayne Rooney, Zlatan Ibrahimovic, Neymar Jr និង Lionel Messi ជាដើម។ ក្នុងចំណោមអ្នកទាំងអស់នោះ Di Maria ចុចឈ្មោះ តារាឆ្នើមអាហ្សង់ទីនជាកីឡាករល្អបំផុត។
ប្រាប់ TyC Sports កីឡាករខាងលើថា៖ “ខ្ញុំធ្លាប់ប្រើប្រាស់ពួកគេក្នុងហ្គេមលើម៉ាស៊ីន PlayStation ហើយអត់ធ្លាប់ស្រមៃទេ ថាអាចលេងរួមគ្នា ដល់ឥឡូវអាចមានឱកាស វាពិតជារឿងដ៏អស្ចារ្យបំផុតក្នុងជីវិត”។
លោកបន្ត៖ “យ៉ាងណា Messi ល្អជាងគេក្នុងចំណោមអ្នកទាំងនោះ ហើយ Cristiano ប្រៀបដូចជាបិសាច ខណៈ Neymar គេរីករាយនឹងការលេងបាល់ទាត់ កីឡាករប្រេស៊ីលលេងបាល់មើលទៅ សប្បាយរីករាយណាស់ ស្របពេល Zlatan លើទីលាន គេប្រៀបដូចជាតួចិត្តអាក្រក់ តែការពិតគេជាបុរសដ៏ល្អម្នាក់ ចុងក្រោយ គឺ Rooney គេជាមនុស្សស្ងៀមស្ងាត់ តែរឹងមាំខ្លាំងណាស់”៕
ប្រភព៖ TyC Sports