តារាឆ្នើម Neymar Jr ទំនងជានឹងដើរចេញពីជម្រើសជាតិ នៅក្រោយចប់ការប្រកួត FIFA World Cup 2022 នៅឯចុងឆ្នាំ ហើយអាវលេខ ១០ របស់ខ្លួន គឺចង់បន្តវេនដល់កីឡាករនៃក្លឹប Real Madrid។ នេះបើតាមការលើកឡើងដោយផ្ទាល់ ពីសំណាក់យុវជន Rodrygo ជាមិត្តរួមសញ្ជាតិ។
បញ្ជាក់ឲ្យដឹងថា តារាឆ្នើមក្លឹប PSG គឺជាកីឡាកររកបានគ្រាប់បាល់ច្រើនបំផុតលំដាប់ទី ២ ឲ្យប្រេស៊ីល បន្ទាប់ពីវីរបុរស Pele តែដោយសារសម្ពាធផ្លូវចិត្ត គេហាក់ជ្រើសយកផ្លូវបែកពីជម្រើសជាតិ ទាំងស្ថិតត្រឹមវ័យ ៣០ ឆ្នាំ។ ចំពោះអាវលេខ ១០ កន្លងមក ក៏ធ្លាប់បានប្រើប្រាស់ដោយសំណាក់កីឡាករ Pele, Ronaldinho និង Kaka មុនពេលដែល Neymar ប្រើប្រាស់មកទល់សព្វថ្ងៃ។
ប្រាប់ទៅ ESPN កីឡាករវ័យក្មេង Rodrygo ថា៖ “Neymar បាននិយាយមកខ្ញុំ ថាគាត់រៀបចំដើរចេញពីជម្រើសជាតិហើយ ខណៈអាវលេខ ១០ គាត់ប្រគល់មកឲ្យខ្ញុំ រួចខ្ញុំអត់ដឹងឆ្លើយតបបែបម៉េចទៅកាន់គាត់វិញទេ ខ្ញុំបានត្រឹមលួចសើចតិចៗ តែក៏បានប្រាប់ទៅគាត់វិញដែរ ថាគាត់សមតែលេងឲ្យបានច្រើនឆ្នាំជាងនេះបន្ថែម”៕
ប្រភព៖ ESPN