នៅការប្រកួតពានរង្វាន់ UEFA Nations League រដូវកាល ២០២២/២៣ ដែលទើបចាប់ផ្ដើមនៅដើមខែមិថុនា បានបង្កើតទស្សនីយភាពគួរឲ្យចាប់អារម្មណ៍ជាច្រើន ជាពិសេសនៅ Group 3 ដែលមានក្រុមជម្រើសជាតិអង់គ្លេស, អ៊ីតាលី, អាល្លឺម៉ង់ និងហុងគ្រី។
មុនបើកការប្រកួត ពោលនៅក្រោយការចាប់ឆ្នោតថ្មីថ្មោងរបស់ UEFA មតិពីអ្នកគាំទ្រជាច្រើន បានបង្ហាញការយល់ឃើញបែបមើលស្រាលប្រហែលគ្នា ថាហុងគ្រី ប្រាកដជានឹងត្រូវក្រុមធំ ៣ ផ្សេងទៀត កៀបដូចចេកចៀន សង្កត់យកពិន្ទុផុយៗជាក់ជាមិនខាន។ មតិខ្លះទៀត ក៏និយាយថា ក្រុមឈរលេខ ៤០ នៅ FIFA Ranking មួយនេះ គិតថាដូចនាំកីឡាករទៅលំហែកាយ ឬកម្ដៅសាច់ដុំទៅចុះ ព្រោះពួកគេនឹងគ្មានគីឡូជាមួយជម្រើសជាតិដូចជាអាល្លឺម៉ង់, អ៊ីតាលី និងអង់គ្លេសនោះឡើយ។
ដល់តែលទ្ធផលបង្ហាញចេញមក នេះគិតត្រឹម ៤ ជុំដំបូង ក្នុងចំណោមការប្រកួត ៦ ជុំ នាវគ្គចែកពូលគឺហុងគ្រី ធ្វើបានល្អខ្លាំង សឹងតែស៊ីរាបលើបណ្តាក្រុមទាំងអស់ ហើយឈរលេខ ១ បណ្ដោះអាសន្ន មាន ៧ ពិន្ទុ នាំមុខទៅលើអាល្លឺម៉ង់ មាន ៦ ពិន្ទុ អ៊ីតាលីមាន ៥ ពិន្ទុ និងអង់គ្លេស មាន ២ ពិន្ទុ។
នេះលេងប៉ះក្រុមដឹកនាំដោយលោក Gareth Southgate គឺសម្ញែងសាច់ដុំយកឈ្នះទាំងពីរជើង សរុបគ្រាប់បាល់ ៥-០ នាំឲ្យតោកំណាច ប្រែក្លាយជាតោក្រដាស ឈរនៅបាតពូល ប្រឈមខ្ពស់នឹងត្រូវធ្លាក់ទៅ League B សម្រាប់រដូវកាលបន្ទាប់។ ខណៈការប៉ះគីឡូធ្ងន់ឥន្ទ្រីដែកអាល្លឺម៉ង់ ក្រុមដឹកនាំដោយលោក Marco Rossi ក៏អាចលេងស្មើថែមទៀត ពោល ១-១ ស្របពេលជំនួបប៉ះអ៊ីតាលី គឺចាញ់ ១-២។ យ៉ាងណានៅសល់ ២ ជុំទៀត ដែលត្រូវប្រកួតនាចុងខែកញ្ញា ដើម្បីសម្រេចថា ហុងគ្រី នឹងអាចឈោងបានកៅអីឆ្ពោះទៅវគ្គ ៤ ក្រុមចុងក្រោយឬក៏អត់។
យើងទៅមើលក្រុមអង់គ្លេស ដែលជាក្រុមជើងឯករងនៅ Euro 2020 ក្រោយការចាញ់ហុងគ្រី ៤-០ ពួកគេក៏បានធ្លាក់ទៅក្នុងកំណត់ត្រាអាក្រក់ ខកខានកើតមានរយៈ ពេល ៩៤ ឆ្នាំ នោះគឺការចាញ់ច្រើនគ្រាប់បំផុតនៅទឹកដីខ្លួនឯង។ នេះក៏កំពុងរុញឲ្យកៅអីអ្នកចាត់ការរបស់លោក Southgate ហាក់កាន់តែក្តៅគគុកឡើងផងដែរ ព្រោះសមាគមមានការបារម្ភខ្លាចក្រែង ក្រុមអង់គ្លេសនៅតែបន្តធ្លាក់ទម្រង់លេង ដ្បិតបើការប្រកួត FIFA World Cup ក៏កៀកនឹងចូលមកដល់នៅឯចុងឆ្នាំ។
ចុងក្រោយយើងធ្វើការអាប់ដែតបន្តិច អំពីចំណាត់ថ្នាក់ FIFA Ranking របស់ក្រុមទាំង ៤ ទើបចុះផ្សាយកាលពីថ្ងៃទី ១៦ មិថុនា៖
អង់គ្លេស ធ្លាក់ចុះ ២៤,២៥ ពិន្ទុ ប៉ុន្តែចំណាត់ថ្នាក់នៅបន្តឈរលេខ ៥ ដដែល
អ៊ីតាលី ធ្លាក់ចុះ ៩,៤៥ ពិន្ទុ ហើយធ្លាក់ចំណាត់ថ្នាក់ពី ៦ មកលេខ ៧
អាល្លឺម៉ង់ ឡើង ៨,៤២ ពិន្ទុ ហើយឡើងចំណាត់ថ្នាក់ពី ១២ មកលេខ ១១
ហុងគ្រី ឡើង ២០,៦៨ ពិន្ទុ ហើយឡើងចំណាត់ថ្នាក់ពី ៤០ មកលេខ ៣៨