ក្រុមជម្រើសជាតិគោព្រៃកម្ពុជា កំពុងស្ថិតក្នុងយុទ្ធនាការប្រកួតពានរង្វាន់ AFC Asian Cup 2023 Qualifiers Final Round ដោយស្ថិតក្នុងពូល D ពួកយើងត្រូវកំណត់ប៉ះឥណ្ឌា នៅថ្ងៃទី ៨ ប៉ះហុងកុងនៅថ្ងៃទី ១១ និងប៉ះអាហ្វហ្គានីស្ថាននៅថ្ងៃទី ១៤ មិថុនា ហើយប្រកួតទាំងបីសុទ្ធសឹងធ្វើឡើងនៅកីឡដ្ឋាន Salt Lake Stadium ក្នុងប្រទេសឥណ្ឌា។
ងាកមកក្នុងអត្ថបទនេះ CTS Sports នឹងធ្វើការរំឭកនូវស្ថិតិដែលកម្ពុជា ធ្លាប់លេងទល់ឥណ្ឌា ក៏ដូចជារឿងរ៉ាវរបស់ខ្សែប្រយុទ្ធ Sunil Chhetri ដែលជាតារាឆ្នើមប្រចាំក្រុមគូប្រជែង ហើយត្រៀមនឹងតាមស្មើកំណត់ត្រាខ្នាតយក្សរបស់ Lionel Messi៖
១) ស្ថិតិប៉ះគ្នារវាងក្រុមទាំងពីរ
កម្ពុជាដែលឈរចំណាត់ថ្នាក់ទី ១៧១ នៅ FIFA Ranking ធ្លាប់ប៉ះឥណ្ឌា ក្រុមឈរលេខ ១០៦ សរុបចំនួន ៤ លើក ហើយលទ្ធផលខាងកម្ពុជា ឈ្នះ ១ ស្មើ ០ និងចាញ់ ៣។
លើកដំបូងដែលក្រុមទាំងពីរជួបគ្នា គឺនៅព្រឹត្តិការណ៍ Merdeka Tournament កាលពីខែកញ្ញា ឆ្នាំ ១៩៦៤ ដោយឥណ្ឌាយកឈ្នះ ៤-០ ហើយរំលងបីឆ្នាំបន្ទាប់ ប៉ះគ្នាជាថ្មី សារនោះនៅពាន AFC Asian Cup យើងបានយកឈ្នះវិញ ៣-១។ នេះគឺជាជ័យជម្នះតែមួយគត់ ដែលយើងសម្រេចបានទល់ក្រុមជម្រើសជាតិឥណ្ឌា។
ដោយឡែករហូតមកទល់ឆ្នាំ ២០០៧ ទើបមានការជួបគ្នាជាថ្មី សារនេះនៅពាន Nehru Cup ដែលឥណ្ឌាបានយកឈ្នះ កម្ពុជា ដល់ទៅ ៦-០ ហើយ ១០ ឆ្នាំក្រោយប៉ះគ្នានៅជំនួបមិត្តភាព ជាការជួបគ្នាលើកចុងក្រោយ ក៏ឥណ្ឌាបន្តយកឈ្នះ ៣-២។ ដូច្នេះមានន័យថា ការប៉ះគ្នានៅពេលខាងមុខ គឺជាការកត់ត្រាស្ថិតិលើកទី ៥ ហើយបើកម្ពុជាអាចយក ៣ ពិន្ទុ នោះប្រាកដជាសង្ឃឹមខ្ពស់នឹងអាចឡើងទៅកាន់វគ្គបន្ត ព្រោះឥណ្ឌាជាក្រុមខ្លាំងដាច់គេប្រចាំពូល បន្ទាប់មកទើបជាអាហ្វហ្គានីស្ថាន និងហុងកុង។
២) ឱកាសបំបែកកំណត់ត្រារបស់ Sunil Chhetri
ឈរជើងតាំងពីឆ្នាំ ២០០៥ មកទល់បច្ចុប្បន្ន ប្រធានក្រុម Chhetri ក៏កាន់តែកៀកនឹងការតាមស្មើកំណត់ត្រាការរកគ្រាប់បាល់ច្រើនបំផុតឲ្យជម្រើសជាតិ ពោលកំពុងក្បែរនឹងកម្រិតរបស់ Lionel Messi។
គិតមុនការប្រកួតទល់កម្ពុជា ខ្សែប្រយុទ្ធវ័យ ៣៧ ឆ្នាំ បង្ហាញខ្លួន ១២៧ ប្រកួត រកបាន ៨០ គ្រាប់ ស្មើនឹងតួលេខ Ali Mabkhout របស់ជម្រើសជាតិអារ៉ាប់រួម ហើយនៅចាញ់ ៦ គ្រាប់ ធៀបនឹង Lionel Messi របស់អាហ្សង់ទីន ដែលមាន ៨៦ គ្រាប់ ក្រោយទើបរកបាន ៥ គ្រាប់ ទល់ក្រុមអេស្តូនី។ នេះមានន័យថា Chhetri ប្រាកដជាដាក់ឆន្ទៈខ្ពស់ និងខិតខំខ្លាំងនៅប្រកួតពាន AFC Asian Cup សារនេះ ដើម្បីយកច្រើនគ្រាប់តាមដែលអាចធ្វើទៅបាន។
បើ ៣ ជុំបន្ទាប់ អាចរកបាន ៧ គ្រាប់ នោះនឹងនាំមុខបណ្ដោះអាសន្នទៅលើ Messi ហើយក្លាយឈ្មោះជាកីឡាកររកបានគ្រាប់បាល់ច្រើនបំផុតលំដាប់ទី ៤ នៅការលេងឲ្យជម្រើសជាតិ។ លើសពីនេះ បើអាចរកបានដល់ ១០ គ្រាប់ នោះនឹងរំកិលចូលលេខ ៣ ទាញទម្លាក់ឈ្មោះអតីតជើងចាស់ លោក Mokhtar Dahari នៃជម្រើសជាតិម៉ាឡេស៊ី ដែលមាន ៨៩ គ្រាប់។ តែយ៉ាងណា វាក៏មិនស្រួលដូចការរំពឹងទុកនោះដែរ ព្រោះអីប្រព័ន្ធការពាររបស់កម្ពុជានៅពេលចុងក្រោយ គឺមិនអាចចូលចុះស្រួលៗឡើយ៕
ប្រភព៖ បរទេស