ក្លឹប Liverpool បានទទួលរងបរាជ័យ ក្រោមលទ្ធផល ១-០ នៅឯវគ្គផ្តាច់ព្រ័ត្រ ពាន UCL ទល់ Real Madrid ហើយបើសួរថា តើនរណាជាអ្នកឈឺចាប់បំផុត? ពួកយើងហ៊ានឆ្លើយមួយម៉ាត់យ៉ាងខ្លីថា នោះគឺ Mohamed Salah។
ដូចអ្នកបានដឹងស្រាប់ហើយ កីឡាករអេហ្សីបបានរៀបរាប់ពីឆន្ទៈដ៏មោះមុត មុនការប្រកួតមកដល់ តែនៅទីបញ្ចប់ Real Madrid នៅតែបន្តហ្សេន ក្លាយជាម្ចាស់ជើងឯកពានអឺរ៉ុបបានដដែល។ មតិជាច្រើនបានបង្ហាញការសោកស្តាយសម្រាប់ Salah ជាពិសេស ព្រោះនៅឆ្នាំ ២០២២ បើទោះបីគេខិតខំខ្លាំង រកបានគ្រាប់បាល់ជាច្រើន តែសមិទ្ធផលធំៗ ដល់ទៅ ៤ បានរបូតចេញជាបន្តបន្ទាប់៖
៤) ចាញ់នៅវគ្គផ្ដាច់ព្រ័ត្រពាន AFCON
ពានប្រចាំទ្វីបអាហ្រ្វិក ដែលកំណត់ត្រូវប្រកួតនៅឆ្នាំ ២០២១ បានលើកពេលមកធ្វើនៅឆ្នាំនេះ ហើយម្ចាស់ជើងឯក បានទៅលើក្រុមជម្រើសជាតិសេណេហ្គាល់។
Salah បានចូលរួមចំណែកជួយជម្រើសជាតិអេហ្សីប ឲ្យឡើងដល់វគ្គផ្តាច់ព្រ័ត្រដែរ តែសំណាងមិនល្អ បែរភ្លាត់ចាញ់នៅបាល់កាត់សេចក្ដីប៉េណាល់ទី ៤-២ ជាមួយការស៊ុតទល់មិត្តរួមក្លឹប គឺ Sadio Mane។ វាជាការសោកស្ដាយដ៏ធំមួយ ព្រោះនេះជាលើកដំបូងដែលកីឡាករវ័យ ២៩ ឆ្នាំ អាចមានឱកាសឡើងដល់វគ្គផ្ដាច់ព្រ័ត្រពានប្រចាំទ្វីប។
៣) បានត្រឹមតំណែងជើងឯករង Premier League
មិនច្បាស់ថាជាឆ្នាំឆុង ឬបែបណា មកដល់លីគកំពូលអង់គ្លេស Salah ដែលប៊ិះតែនឹងបានកាន់ពានទៅហើយ ចុងក្រោយបែរចាញ់ Man City ១ ពិន្ទុ កំណត់ឲ្យត្រឹមជាក្លឹបឈរលេខ ២ នៅបញ្ចប់រដូវកាលកន្លងទៅនេះ។
ខ្សែប្រយុទ្ធខាងលើ បានខិតខំខ្លាំងណាស់ ដល់ក្លាយជា Top Scorer ប្រចាំលីគ រកបាន ២៣ គ្រាប់ឲ្យហង្ស តែទីបញ្ចប់ Liverpool បែរត្រឹមឈរជើងឯករង ក្រោយឆ្លងកាត់ការដល់វគ្គចុងក្រោយ ជុំទី ៣៨។
២) បានត្រឹមតំណែងជើងឯករង UEFA Champions League
គិតថាចង់សងសឹក Real Madrid ដែលជាគំនុំចាស់កាលពីឆ្នាំ ២០១៨ តែឥឡូវមានឯណា បែរត្រូវអធិរាជស បន្ថែមជ័យជម្នះជាលើកទី ២ នាំឲ្យកីឡាករអេហ្សីបមានការបាក់មុខ និងសោកស្ដាយជាខ្លាំង។
មួយជើងរបស់ Vinicius Junior បានសម្រេចលទ្ធផលឲ្យក្លឹបអេស្ប៉ាញ ក្លាយជាម្ចាស់ជើងឯក ហើយ Liverpool ត្រឹមជាជើងឯករងទាំងមិនអស់ចិត្ត ដ្បិតបើពេញ ៩០ នាទី ពួកគេស៊ុតដល់ទៅ ២៤ លើក ធៀបនឹងក្លឹបគូប្រជែង ស៊ុតតែ ៤ លើកគត់។ អ្នកដែលរាំងស្ទះដំណើរលើកពានរបស់ Salah សារនេះ គ្នាយើងគួរតែដឹងច្បាស់ នោះគឺដៃមឹក ៨ ទិស Thibaut Courtois។
១) ខកខានការទៅលេងនៅ World Cup
កាលពីឆ្នាំ ២០១៨ អេហ្សីបមានកៅអីបានទៅលេងនៅ World Cup តែធ្លាក់ត្រឹមវគ្គចែកពូល។ ដល់តែឆ្នាំ ២០២២ ដែលកាតារធ្វើជាម្ចាស់ផ្ទះ ជម្រើសជាតិរបស់ Salah បែរជាខកខាន ឈោងបានឱកាស ហើយធ្លាក់ក្រោមថ្វីជើងសត្រូវរួមក្លឹប គឺសេណេហ្គាល់សារជាថ្មី។
៥ កៅអីសម្រាប់ប្រទេសនៅអាហ្វ្រិក មានហ្គាណា, សេណេហ្គាល់, ទុយណេស៊ី, ម៉ារ៉ុក និងកាមេរ៉ូន ខណៈដែលអេហ្សីបធ្លាក់នៅវគ្គជម្រុះជុំចុងក្រោយ ក្រោមថ្វីជើងរបស់សេណេហ្គាល់ម្តងហើយម្តងទៀត ហើយនៅវគ្គស៊ុតបាល់ប៉េណាល់ទីដដែល ក្រោមលទ្ធផល ១-៣៕
ប្រភព៖ បរទេស