មុនឈានដល់ការប្រកួតវគ្គផ្ដាច់ព្រ័ត្រ ទល់ក្លឹប Real Madrid ងាកទៅខ្សែប្រយុទ្ធ Luis Diaz របស់ Liverpool ក៏បានបង្ហាញនូវការព្រួយបារម្ភមួយចំនួន ក៏ដូចជាចុចឈ្មោះកីឡាករគ្រោះថ្នាក់បំផុត ដែលហង្សគួរតែប្រយ័ត្ន។
នេះជាលើកទី ១ សម្រាប់កីឡាករកូឡុំប៊ី នៅឱកាសតតាំងក្លឹបជើងឯក ១៣ សម័យកាល Real Madrid នៅវគ្គពិសេស ជួនពេលដែលវាក៏ជាក្តីស្រមៃរបស់គេតាំងតែពីដើមមកដែរ។ Diaz ប្រាប់មុនការប្រកួត៖ “ខ្ញុំតែងតែស្រមៃចង់ឈានមកដល់វគ្គផ្តាច់ព្រ័ត្រ Champions League ហើយជាពិសេសលេងទល់ក្លឹបយក្សដូចជា Real Madrid នេះក្តីស្រមៃរបស់ខ្ញុំបានកើតឡើង ដូច្នេះខ្ញុំនឹងព្យាយាមបង្កើតភាពរីករាយ និងទាញប្រយោជន៍ពីវាឲ្យបាន”។
លោកបន្ត៖ “ប្រសិនក្លឹបផ្តល់ឱកាសឲ្យខ្ញុំ ខ្ញុំនឹងផ្តល់ទៅវិញ ១០០ ភាគរយ ព្រោះខ្ញុំតែងតែត្រៀមលក្ខណៈរួចរាល់ជានិច្ច យើងដឹងថា Real Madrid ជាក្រុមពោរពេញដោយបទពិសោធន៍ តែយើងក៏មានប្រព័ន្ធកីឡាករដ៏ល្អមួយដែរ”។
បន្តទៅការចុចឈ្មោះកីឡាករ Real Madrid ដែល Diaz គិតថាគួរឲ្យគ្រោះថ្នាក់បំផុត គេបានសង្កត់ធ្ងន់៖ “នោះគឺ Karim Benzema, Vinicius Junior និង Toni Kroos”។ បញ្ជាក់ថា អ្នកទាំងបីសុទ្ធសឹងជាកីឡាករចូលរួមចំណែករកបានគ្រាប់បាល់នៅ UCL ឲ្យអធិរាជស រដូវកាលនេះ ដោយសរុបមាន ១៩ គ្រាប់ កើតចំណែកធំពីសំណាក់កីឡាករបារាំងតែម្នាក់ឯង មានដល់ ១៥ គ្រាប់។
បន្តទៅរឿងរ៉ាវនៅ UCL នេះដែរ ងាកទៅអតីតកីឡាករលោក Michael Owen ក៏បានធ្វើការទស្សន៍ទាយលទ្ធផលជាមុន ដោយថា Liverpool នឹងអាចបំបាក់ Real Madrid ហើយក្លាយជាម្ចាស់ជើងឯក UCL លើកទី ៧ ក្នុងប្រវត្តិសាស្រ្ត។
បញ្ជាក់ថា Liverpool ទើបតែឈ្នះពាន UCL លើកចុងក្រោយ កាលពី ឆ្នាំ ២០១៩ ពោលក្រោយមួយឆ្នាំ នៃពេលវេលាដែលក្រុមដឹកនាំដោយលោក Jurgen Klopp បានចាញ់ Real Madrid ១-៣ នៅវគ្គផ្ដាច់ព្រ័ត្រ ឆ្នាំ ២០១៨។ យ៉ាងណាសារនេះ Owen បានព្យាករណ៍លទ្ធផលបញ្ច្រាស ថាគ្រាប់បាល់នឹងកើតឡើងដូចសារមុន តែហង្ស គឺជាអ្នកឈ្នះ។
លោក Owen និយាយប្រាប់សារព័ត៌មាន Daily Mail បែបនេះ៖ “ខ្ញុំគិតថា Liverpool ពេលចុងក្រោយ គឺល្អជាង Real Madrid ហើយក្លឹបប្រាកដជាអាចបំបាក់ Real នៅលទ្ធផល ៣-១ ឬក៏ ៣-០ នេះបើផ្អែកតាមការទស្សន៍ទាយរបស់ខ្ញុំ”។
រំឭកឲ្យដឹងដែរថា Owen មិនមែនតែធ្លាប់ជាសមាជិកនៅហង្សក្រហមប៉ុណ្ណោះទេ អតីតកាលគេក៏ធ្លាប់ឈរជើងឲ្យក្លឹប Real Madrid ផងដែរ តែចាយពេលត្រឹមមួយឆ្នាំ ក្រោយរួមអាជីពជិត ១០ ឆ្នាំនៅ Liverpool។ ចំពោះកាលបរិច្ឆេទប្រកួត នឹងចាប់ផ្តើមនៅវេលាម៉ោង ០២:០០ នាទីទាបភ្លឺ ឈានចូលថ្ងៃអាទិត្យ ទី ២៩ ឧសភា មានផ្សាយផ្ទាល់លើទំព័រ CTS Sports៕
ប្រភព៖ បរទេស