ការទន្ទឹងរង់ចាំនៅការប្រកួតពានរង្វាន់ចុងក្រោយគេបង្អស់ប្រចាំរដូវកាល គឺ UEFA Champions League បានកៀកជិតមកដល់ហើយ ដោយតាមកាលបរិច្ឆេទ Liverpool នឹងត្រូវតតាំង Real Madrid នៅឯកីឡដ្ឋានក្នុងទីក្រុងប៉ារីស នាវេលាម៉ោង ០២:០០ នាទីទាបភ្លឺ ឈានចូលថ្ងៃអាទិត្យ ទី ២៩ ឧសភា មានផ្សាយផ្ទាល់លើទំព័រ CTS Sports។
ការស្រលាញ់ពេញចិត្តរបស់អ្នកគាំទ្រម្នាក់ៗ គឺមានខុសៗគ្នា ខ្លះទៅគាំទ្រក្លឹបអេស្ប៉ាញ ខ្លះក៏គាំទ្រក្លឹបអង់គ្លេស ពោលចង់ឃើញ Liverpool អាចសងសឹក យកឈ្នះទៅលើ Madrid ក្រោយកើតបរាជ័យ ១-៣ កាលពី ៤ ឆ្នាំមុន។ ចុះងាកទៅកំពូលកីឡាករ Kylian Mbappe ឯណោះ រវាងក្លឹបទាំងពីរ តើគេជាអ្នកគាំទ្រក្លឹបណាមួយ?
ក្រោយការប្រកាសបន្តកុងត្រាថ្មី ជាមួយ PSG យុវជនវ័យ ២៣ ឆ្នាំ ក៏បានចេញមកបញ្ជាក់ផងដែរ ថានាវគ្គផ្តាច់ព្រ័ត្រ UCL ខាងមុខ ខ្លួនគាំទ្រចង់ឲ្យ Real Madrid ក្លាយជាម្ចាស់ជើងឯកលើកទី ១៤។ សរសេររៀបរាប់លើ Twitter កីឡាករសញ្ជាតិបារាំង បញ្ជាក់៖ “ខ្ញុំយល់ពីការខកចិត្តរបស់ក្លឹប Real Madrid ដែលមិនជោគជ័យលើការចុះហត្ថលេខា តែខ្ញុំចង់ប្រាប់អ្នករាល់គ្នាឲ្យបានដឹងថា ខ្ញុំនឹងក្លាយជាអ្នកគាំទ្រដ៏ធំជាងគេ និងមុនគេបង្អស់សម្រាប់ពួកគេ ក្នុងការក្លាយជាក្រុមឈ្នះជើងឯក ក្នុងទីក្រុងប៉ារីស ដែលជាទឹកដីកំណើតរបស់ខ្ញុំ”។
នេះវាអាចជាចម្លើយគួរឲ្យភ្ញាក់ផ្អើលមួយដែរ តែមតិខ្លះក៏ថា Mbappe និយាយ ព្រោះចង់លួងចិត្តអ្នកគាំទ្រ Real Madrid តែប៉ុណ្ណោះ។ ជាការពិត PSG ត្រូវបានក្លឹបអេស្ប៉ាញ Madrid នេះឯង ជាអ្នកទម្លាក់ឲ្យហាលអាវត្រឹមវគ្គ ១៦ ក្រុម ដែលស្ពឹកមុខខ្លាំងត្រង់ ២ នាទី ២ គ្រាប់នៅកំឡុងនាទី ៩០ ដោយថ្វីជើងរបស់ Rodrygo។
បង្វែរទៅរឿងគួរឲ្យចាប់អារម្មណ៍មួយផ្សេងទៀត កំឡុងការចរចាស្វែងរកក្លឹបថ្មី កាលពីប៉ុន្មានខែមុន Mbappe ក៏បានសារភាពច្បាស់ៗផងដែរ ថាក្រៅពី Real Marid ក៏មានក្លឹប Liverpool មួយផ្សេងទៀត ដែលស្ថិតក្នុងការពិចារណា។
ខ្សែប្រយុទ្ធសញ្ជាតិបារាំង និយាយបែបនេះ៖ “ខ្ញុំក៏បានជជែកជាមួយភាគីក្លឹប Liverpool ព្រោះអីពួកគេជាក្លឹបដែលម្តាយខ្ញុំគាំទ្រ ម្តាយខ្ញុំស្រលាញ់ Liverpool ខ្លាំងណាស់ ខ្ញុំអត់ដឹងហេតុអីទេ បើអ្នកចង់ដឹងមានតែទៅសួរគាត់ យ៉ាងណាពួកគេជាក្លឹបល្អមួយ ដែលខ្ញុំបានជួបតាំងពី ៥ ឆ្នាំមុន កាលខ្ញុំនៅលេងឲ្យ Monaco”។
រំឭកថា ជាមួយសុពលភាពកុងត្រាថ្មី ដល់ចុងខែមិថុនា ឆ្នាំ ២០២៥ Mbappe អាចកើបចំណូលចូលហោប៉ៅល្បាក់ ១ លានផោន/សប្ដាហ៍ ដែលគិតពេញមួយរដូវកាល ទាំងប្រាក់ឧបត្ថម្ភផ្សេងៗទៀត គឺសរុបចូលក្បែរ ១០០ លានផោនឯណោះ។ ប្រកួតបន្ទាប់របស់យុវជនវ័យ ២៣ ឆ្នាំ គឺកំណត់ត្រូវទៅជួយជម្រើសជាតិបារាំង លេងនៅពានរង្វាន់ UEFA Nations League មានដូចជាការប៉ះដាណឺម៉ាក ក្រូអាត និងអូទ្រីស៕
ប្រភព៖ បរទេស